“啋咚哩啋”学概率

◆ 刘其舜

概率好像是一门老深个学问。勒拉数学上头，先要学排列组合，再慢慢交深入学概率。

勿过，勒拉阿拉老里八早个小辰光游戏里向，就接触概率了。“啋咚哩啋”是阿拉老一辈上海人侪晓得个游戏。现在普通话讲多了，交关小囡只晓得“剪刀石头布”。其实迭两样是一式一样嗰，发音个停顿也是错勿多。“剪刀石头布”发音时，勒拉“剪刀石头”后头停顿一歇歇，再重音说个“布”；“啋咚哩啋”发音时，在“啋咚哩”后头停顿一歇歇，再重音说个“啋”字。勿过，“剪刀石头布”比较形象一点。小辰光，阿拉勿但用手，还可以用脚“啋咚哩啋”。一脚向前、一脚向后，形成了“剪刀”；两脚并拢，就是“石头”；两脚平列分开就是“布”。

“啋咚哩啋”是两个人白相个游戏，概率上讲两人总有一个人胜利，是二分之一。

人勿止两个哪能办？当年上海小囡就用“乒令乓冷气”搿个游戏。同样，勒拉大家喊“乒令乓冷气”个辰光，喊了“乒令乓冷”后，要停顿一歇歇，再喊一个“气”。勒拉喊“气”辰光，每个人从背后老快个出手，手掌或者是手背。其中只有一个人是手掌或者手背，就算胜利了。如果有八个人，一次成功，概率就是八分之一。勿过勿会搿样巧嗰，总归要试好多次，才能出现一次。如果用概率算，就勿容易了。

“乒令乓冷气”也可以分组游戏。同样八个人，分两组，每组四人，也要好多次，才能恰巧四对四。搿搭也有组合搭仔概率个知识。

还有勒拉聚会辰光，大家排成一圈，“击鼓传花”选出一个人唱歌。搿个概率要用击鼓个频率和击鼓围绕人群个次数来计算了。如果讲，同样频率来讲，多少人参加，就是多少人个几分之几，相当简单了。

小辰光，还有个游戏。用四张小纸条，写上“官”“打”“捉”“贼”四个字。由“官”先猜其他三个人，搿是三选一，猜到了“捉”，就算赢了；接着再让“捉”在其他两个人里“捉贼”，搿搭又有两选一概率……

现在高中大学基本普及了，儿女们侪学过排列组合搭仔基本个概率知识。阿拉人老了，搭仔儿女们一道温习一下迭个排列组合搭仔概率知识，祖孙三代一道“啋咚哩啋”，多少开心，天伦之乐啊！