妇女用品商店忆旧

◆ 冯济民

上海有名个淮海中路浪个妇女用品商店停业装修了。消息发布，引起勿小反响。我虽然是个男同胞，也对迭爿店有眼留恋。因为我搭搿爿商店有一段缘分。

当年，我屋里就住勒南昌路雁荡路口，搭妇女用品商店近在咫尺。1956年伊成立时，我已经8岁，可以讲我是看伊建立开张营业个。小辰光，饭后茶余或节假日，姆妈常常带我去逛商店，陪伊选购各种物事。当年，搿爿商店里有小百货柜台，一般个日用商品侪能买到。后来，我也成了店里个常客，有空欢喜到店里看看。外地亲友托买物事，我也会到店里去看看有勿有，价钿多少，买下来邮寄过去。

1968年，我拨分配到崇明农场。姆妈拿了录取通知书到店里买一眼凭证供应个物事。其中一条十块洋钿买个蓝颜色棉毯斜气别致，因为当年绝大多数棉毯侪是灰颜色个。时至今日，伊已经陪伴我56年了。

1979年儿子出生，因妻子勒外地工作，伊拨寄养勒妇女用品商店对面沿马路个一家人家里。每天下班以后，我总会去看望儿子，抱仔伊到淮海路白相，到妇女用品商店看五颜六色个橱窗。记得有种橱窗里是动画布置，一条条鱼会得游。儿子看了拍拍小手咯咯笑，我也老开心个。

1982年，姆妈六十岁生日个辰光。我勒妇女用品商店挑选了一把折叠伞作为礼物。妈妈斜气欢喜，一直用到去世。现在，伞仍旧放勒门边个伞架浪，赌物思人。

1998年，我勒浦东买了房子，离开浦西，也远离了妇女用品商店。

一晃几十年过去了，但旧日记忆始终难以忘记。