摸鱼捉蟹个童趣

微信扫码看视频听钱程沪语朗读

◆ 陈祖龙

小辰光，我住勒勒宝山县乡下头。宝山县北濒长江，东临东海，宽阔个蕰藻浜勒勒境内浩浩荡荡流过，房子个附近总归有各种河浜沟渠。勒勒迭种水乡环境生长个小囡，大热天侪跳进水里，偷凉降温，摸鱼捉蟹，至今令人魂牵梦绕……

每逢雷雨前夕，天浪乌云笼罩，地面气压降低，鱼勒水里也屏勿牢了，纷纷浮上水面，大口大口吸气，一两尺长个大鱼成群结队游出水面，乌黑个背脊时隐时现，扬起一圈圈涟漪，斜气壮观。埃歇辰光，阿拉经常迓勒岸边个大树后头，手里拿一根长长个树枝，瞄准鱼群，用足力气抽下去。假使额角头高，就会有鱼翻白肚皮浮上水面。用迭种办法捉到个侪是大鱼。

勒竹篮浪缚一根尼龙绳，选择水草茂盛、鱼虾比较多个河浜，拿竹篮用力朝河浜当中厾过去，等竹篮沉到水底，再担竹篮贴河底拉回岸边，拎出水面。竹篮捞鱼勿需要专门准备渔具，简单方便，虽然捞勿到大鱼，但螺蛳、蚬子、河蚌、龙虾、手指粗细个青壳河虾搭仔小鲫鱼、小鳊鱼、柳条鱼咾啥，总归能够捉到一眼。一两个钟头下来，吃饭台子浪也能添几碗河鲜。

河边个一棵杨柳树，枝干粗壮，树根一半浸勒水里，形成一道道缝隙，青壳河虾顶欢喜蹲勒里向。阿拉轻手轻脚走到水里，两只手臂张开呈半圆形，慢慢交包抄上去，常常可以摸到几只。还有好白相个事体，一趟我勒河浜当中摸到一只空个氨水甏，曾经听摸鱼行家讲过，空甏之类个物事勒勒河浜里辰光长了，会有鱼勒里向做窠。我顿时兴奋起来，一只手堵牢甏口，只留一道小缝，另一只手从小缝伸进去，甏内顿时鱼儿蹿动，由于甏口拨我封牢，鱼逃勿脱，迭个一趟有5条鲫鱼全部“乔迁”进了鱼篓。

搭水面齐平个河沿，常常有扁圆形个洞穴。假使洞口泥土光滑，隐隐交有蟹脚爬过个痕迹，十有八九有迓勒海个清水大闸蟹。只要一只手捂牢洞口，另外一只手拿粗铁丝伸进洞去，惹惹搿只蟹，清水蟹就会乖乖交爬出来，束手就擒。当然也有例外，有一趟我手浪个铁丝明明已经触碰到蟹壳了，伊只蟹竟然老奸巨猾个一动勿动。我光火了，为了避免拨蟹钳夹伤，我勒了手臂浪涂满松软滑腻个河泥，伸进洞去。迭只蟹洞特别深，我几乎拿整条手臂侪伸进去了，才拿迭只蟹掏出来，蟹壳足足有碗口迭能大，颜色青中带黑。回到屋里，老爸一看，连连称奇，讲迭能大个蟹实在稀奇，特地温了一壶黄酒，美滋滋个享用了。

需要多人配合个“击水扰鱼法”更加好白相。七八个甚至十几个小囡排成一排，勒勒一个顶有威信个皮小囡带领下头，喊着“一两三”个口令，手脚拼命拍打水面，水面浪银珠四溅，波涛翻滚，交关好看。过脱一歇，清澈个河水变得浑浊，爱清洁个白鱼“扑通，扑通”跳出水面，有辰光拨鱼尾巴甩到面孔浪还真有眼痛唻。每趟“击水扰鱼”，总归有几条特别生猛个大白鱼用力过猛，会跳到岸浪，勒勒草丛里挣扎翻腾。迭个辰光，阿拉会用顶快个速度游到岸边，因为啥人先爬到岸浪揿牢鱼身，大白鱼就归啥人。开开心心抱转去，既得到爷娘一顿夸奖，饭桌浪又多一大碗可口个小菜。