吃一顿象山海鲜

◆ 沈一珠

讲到吃一顿海鲜，跟阿拉上海人平常讲个“今朝夜饭小菜里有一碟清蒸带鱼”，或者“今朝阿拉吃大黄鱼咸菜汤”，侪是勿一样嗰；一定是今朝个菜单浪必须有潮潮泛泛个鱼腥虾蟹，要么至少像阿拉搿天夜里勒朋友屋里吃个一顿个排场势：虾、海蜇头、带鱼、鲳鱼、乌贼鱼、比目鱼……还有点啥勿记得了，只记得搿天降胆固醇个药是加了点量嗰。

搿天早浪睏到7点多钟起来，吃好早饭，叫了滴滴到虹桥火车站，正好开始检票。乘高铁到杭州东，再乘出租车到杭州西朋友屋里，齐巧吃中饭。差勿多辰光，朋友托人从象山寄来个海鲜也到了。老家勒象山个朋友，对海鲜个要求是呒没进过冰箱；勿像阿拉上海人，小菜场里买带鱼，翻翻鱼隔腮，看看闻闻，颜色新鲜呒啥怪味道就可以了。

一边看朋友汏鱼，一边跟伊讨论鱼的烧法：

伊讲，目鱼大烤是肯定嗰，带鱼是清蒸还是糖醋呢……

我讲，清蒸啊，介新鲜个鱼，唯有清蒸才能让嘴巴充分感受到昨日刚刚捉上来个鱼个新鲜度呀。肚肠挖脱，汏清爽，擦一点点盐，肉头会稍许紧一点点；带鱼斩成段，整齐放到碟子里，摆点葱姜去腥，提香，蒸锅里水烧开，碟子摆进去，蒸10分钟就好……

伊讲，应该蒸六七分钟就够了吧……

辣末生头惊醒，一个从小吃干煎小带鱼过泡饭个上海人，居然教象山人烧海鲜，迭份自信到底是啥地方来嗰？快点迓出去。

等齐前前后后赶过来个人，夜饭开吃。清蒸带鱼肉头正正好，细腻肥美；总觉着鲳鱼个肉头过于水嫩了点，筷子几乎搛勿起来，要用调羹帮一把忙；目鱼大烤是近两年吃到顶顶好吃嗰，毕竟，又新鲜又大；海蜇头咬劲十足；大虾啥味道么，忘记脱了，或许压根呒没来得及吃。最后端上来个红烧比目鱼是顶顶入味嗰，煎过个鱼皮带一点点焦香，吃足了汁水，满嘴巴鲜香，酱色中，鱼肉看上去洁白而鲜嫩……