拿生梨烧熟了吃

◆ 沈一珠

虾仁炒生梨，虾350克，汏清爽，剥壳，开背，去脱虾线泥肠，吸干水分后，用少许盐、料酒以及蛋清捏匀，再摆生粉，拌均匀，能事先腌个把钟头顶好；皇冠梨一只，削皮，梨肉切成丁，备用；镬子里加油，虾仁倒下去撩一撩，熟了，盛出来沥干；油重新烧热，生梨丁也摆下去快速翻炒，盛出来沥清爽；再用清爽镬子加清水、盐，烧开，生梨搭子虾仁先后摆下去，勾薄芡，翻炒均匀，盛出来就好。

迭能一碟小菜，虾仁粉红弹牙，梨丁白嫩水滑，味道咸甜鲜香得斜气清爽相，随便上手一只家常小菜，就有一种宴会菜个卖相。

想着迭能吃梨，也是因为前一腔到山西白相。山西体感清爽，早晚虽然要穿外套，大白天太阳下头，又热又干燥。出得太原往南，头一站就是灵石县王家大院。有“中国民间故宫”和“山西紫禁城”之美称个王家大院分成两个部分：高家崖建筑群，也称视履堡，是当年王家正四品王汝成与正五品王汝聪两兄弟个官宅；红门堡建筑群，又称恒贞堡，是民宅，堡内88座院落形态各异。

东西两部分之间有一桥相连，组成了一个全封闭个城堡。一口气走下来就不容易，更何况，碰着正院、绣楼、书屋、饭堂之类，还想细细看看究竟……所以，出得大院，筋疲力尽、口干舌燥之际，就撞着了让人解渴去乏个烤梨：一个山西老汉，一只隔成小格个烤炉，老汉打开小格门，捧出一只烤成焦糖色个梨，拳头大小，手感温热，梨肉软糯，如果讲，刮辣生脆一口梨让人刹那解渴，是外向个补水，烤熟个一口梨则给人慢慢生津个滋润，是内敛个给养。

回来几日，也曾经想过，用屋里个烤箱再复制一只烤梨，再想想，旅途中，好景好物好滋味，缺一不可，复刻却很难。算了。

一方水土养一方人，讲个应该是各有各个活法，各有各个吃法。回到上海，秋意渐浓，假设侬肠胃偏寒，一只生梨下去，会觉着肠胃冰骨丝窨，侬可以拿生梨烧熟仔吃。除脱炒虾仁、炒鸡片之类，侬还可以拿生梨切块，摆几粒红枣、枸杞一道烧茶，也可以拿芯子挖空，摆点冰糖、枸杞子进去，隔水蒸熟仔吃。