旅游节看花车巡游

◆ 薛鲁光

夜幕降临，我搭老伴骑脚踏车来到南京路步行街，看第35届上海旅游节开幕式暨花车大巡游表演。从2002年开始，上海旅游节看花车巡游成了阿拉屋里个保留节目，因为之前侪是辣淮海路看花车，离阿拉屋里比较近。

一晃廿几年过去了，今年个花车巡游改到了南京路步行街，路有点远，要勿要去，我让老伴考虑考虑。呒没想到，伊张口就是一个字：“去！”于是乎，早早吃好夜饭，一人一辆脚踏车，六点钟之前就到了步行街，占了两个好位置。

看看周围，交关人结伴而来，夫妻档、同学档、闺蜜档，还有勿少组团从绍兴、温州、衢州来旅游个游客。明明大家侪是素昧平生，互相打个招呼，茄几句山河，顿时就好像久别重逢个老友。

辰光接近八点钟，人群涌动起来。远远传来“来了，来了”个喊声，25辆花车缓缓入场。开场节目《燃动，欢乐之城》开启了庆典活动个序幕，巴黎奥运会上海选手代表搭仔上海小荧星艺术团个小朋友，用欢快个歌声点燃了现场个气氛。

搿趟巡游个头车是乐高乐园花车，看起来就像用乐高积木拼起来嗰，车头浪是乐高悟空小侠里个孙悟空，后面有体现水乡风情个游船装置，车尾还有棕榈树，休闲度假个氛围拉满。“敦煌金”号花车展示了敦煌个文化元素，包括舍己救人、不图回报个九色鹿；雍容大方、摇曳生姿、反弹琵琶个飞天；循环往复、奔腾不息个三兔共耳。吉林省个花车逼真还原了雪国风光搭仔长春电影制片厂个光影记忆，让我想起小辰光看过个电影，《上甘岭》《英雄儿女》《平原游击队》……

除脱花车，还有从法国、美国、波兰、爱尔兰等国家搭仔地区来个16支境外民间表演队，9支国内表演队进行表演。法国个洛里昂风笛乐队，笛声婉转悠扬；巴西个桑巴舞热辣狂放；西班牙个伦巴舞音乐缠绵、舞步婀娜；还有奥地利个富施古典管乐团，演奏了音乐作品《上海滩》……各种各样个主题、风格、节奏辣步行街浪流淌，让人感受到勿同文化个碰撞与交融，展示出“美美与共”个美好画卷。

回程路浪，老伴难掩一饱眼福个快乐，直夸“值得一看，不虚此行”。是个呀，每一次个花车巡游勿仅是一场视觉盛宴，更是对上海独特魅力个致敬。