弄堂游戏“廿四点”

◆ 胡维兴

讲起小辰光个弄堂游戏，扑克牌是最常用个游戏道具。除脱“大怪路子”“八十分”“斗地主”，“廿四点”也是一个斜起受欢迎个游戏。迭只游戏既可以四个人白相，也可以两个人PK。四个人白相个辰光，先拿扑克牌里个大小王和J、Q、K侪去脱，剩40张数字牌，平均发牌，每人10张，然后每人拿出一张牌，凑成四张，啥人先用搿四张牌通过“加、减、乘、除和括号”算出廿四点，就敲一记台子，随后讲出算法。算法正确，就算过关，手里搿张牌可以厾出去作废，其他人保留。啥人先厾光手里个牌就算赢。

眼睛一眨，几十年过去了，我已经是一个老年人了。听朋友讲，老年人也要多动动脑筋，有益身心健康，我又重新白相起迭只游戏。辣屋里向，一家头拿一副扑克牌，每次发四张，快速心算，争取最快速度出结果。白相次数多了，倒也熟能生巧，有了一点“门槛”。有辰光女儿带外孙女来屋里白相，我跟伊拉PK，总归是我赢。出门在外，凡是看到四个以上数字，侪会算一遍“廿四点”。

再过一段辰光，又觉着搿能算法比较简单，就拿J（11）、Q（12）、K（13）也加进来，变成升级版，难度增加了，脑子好像也更灵活了。或许搿也是“用进废退”个一种体现，老年朋友不妨一试。