我搭夜报个缘分

◆ 周钰栋

讲起搭新民夜报个缘分，就要先讲到几桩趣事。上世纪六十年代初，号召向雷锋同志学习。我一记头就想到班级里有位女同学每天放学侪会急急忙忙跑到邮局门口，同辣报摊头浪卖夜报个姆妈换班，好让伊回去烧夜饭。

我搭几个同学一商量，决定放学以后去帮搿位女同学卖报，让伊早点回去吃饭、做功课。结果么，印证了“嘴上没毛，办事不牢”搿句老话。阿拉几个人毛手毛脚，帮了勿少倒忙，女同学急得哭出来。第二天，女同学向老师告状，老师批评阿拉，讲：“帮助同学是好嗰，做法实在勿对，做好人好事也要多动脑筋。”最后要求阿拉一要道歉，二要想办法补救。

葛末哪能补救呢？我只好回去跟阿爸姆妈商量。还是阿爸有办法，伊讲：“隔壁老伯伯夜快头要出去买夜报，侬去对老伯伯讲，可以放学以后帮伊买夜报，另外阿爸再拨侬三分洋钿，侬到同学个摊头浪买两份夜报，一份拨隔壁老伯伯，一份阿拉屋里自家看，侬一下子就做了两桩好事体。”

从此以后，我也天天看夜报，从国家大事到散文言论，看得津津有味。我搭夜报就此结缘。

夜报复刊，我看到有一个版面叫“科学馆”，我从小就对科技感兴趣，每一期侪会仔细阅读。辰光一长，灵感被激发出来，开始投稿。起初，稿件大都用辣“一分钟遐想”栏目。后来，我个好几篇文章经编辑丹长江老师推荐，参加了“全国星火杯发明创造”大赛和“我为节能减排献一计”征文比赛，而且侪得了奖。迭能一来，惊动了亲戚朋友搭仔弄堂里个爷叔阿姨，辣了大家个鼓励下头，我又向“夜光杯”“上海闲话”等版面投稿，得到各位编辑个勿少帮助。

夜报个读者、作者、编者之间总有一种温情。