想起老早行路难

微信扫码看视频听钱程沪语朗读

◆ 侯宝良

前几天去闵行白相，乘地铁半个多钟头就到了，让我想起当年搭公交车去闵行上班个事体。

改革开放前，上海交通欠账十分严重，有人计算过，上下班高峰，市区公交车浪每平方米里向有12只脚，也就是要立6个人，轧公交车，轧得前胸贴后背。假使要去郊区，交通就更加困难了，以闵行为例，只有一路长途汽车“徐闵线”，起点站就勒了徐家汇徐汇剧场旁边，单程车票4角。到了闵行，再换乘其他公交车，市区月票是勿通用个。当年我工作个上海电机厂就勒了闵行，因为交通不便，厂里职工一般每个礼拜只回一趟市区，勿少职工家庭个生活因此就受到了影响。

改革开放以后，不少工厂为了方便职工往返市区，增加了班车，倒也解决了勿少职工个生活难题。不过么，最初个班车侪是向公交公司租用个车子，数量有限，车况也比较差。

为了解决班车车子少、车况差个难题，上海重型机器厂率先向上海客车厂订购10辆铰接式公交车，俗称“巨龙车”。我工作个上海电机厂也跟进买了10辆巨龙车。之后又有勿少工厂下单订购。上海客车厂有了订单，但劳动力勿足，就向其他工厂求援。为了让本厂职工早日乘上新班车，一些工厂就决定派职工支援上海客车厂，我就拨勒厂里派到上海客车厂工作过一段辰光。

当时正逢经济大发展，工业发展离勿开供电，但是电厂发电量有限，为了保证居民生活用电，上海客车厂经常错峰让电，工人上班改为上长中班，就是从下半天个5点钟，上到第二天个早浪向。我尽力克服各种个勿适应，搭上海客车厂个师傅们一道工作了半年，直到自家工厂订购个车辆交货。记得离别个迭一天夜里，上海客车厂个朋友们为我开了一场欢送会，临走个辰光呢，有一位年轻姑娘依依不舍个对我讲：“侬就搿能走啦？”我对伊讲：“后会有期。”呒没想到，阿拉两家头有一天真个是有缘重逢，成就了一场姻缘，相伴终生。

随着车辆陆续交付，每到下班辰光，从各家工厂开出来个大客车汇聚到沪闵路，一时间车流滚滚，成了一道靓丽个风景线。

从帆布车篷个卡车，到车况不佳个公交车，再到崭新个巨龙车，班车个变化与时代同步。再后来公交、地铁得到了极大个发展，各家工厂个班车陆续停运。往事如烟，眼睛一眨，“轧公交”搭仔“乘班车”已经成了阿拉迭个一代人个回忆。