耳朵勿灵听豁边

◆ 钱红春

阿拉屋里就我搭老伴两家头，侪是八十岁出头个老人了，平常对话交流侪讲上海闲话。勿晓得从啥辰光开始，我个耳朵勿大灵了，常常要拿老伴个闲话听豁边，闹出勿少笑话。

记得有一天夜快点，两家头吃好夜饭，我收作好厨房间回到客厅。老伴问我：“侬走路哪能跌跌冲冲？”我一听，就朝阳台外头看看讲：“瞎三话四，外头太阳还呒没落下去，辰光一点勿晏！”老伴一听，觉着莫名其妙。后来才弄清爽，我拿“跌跌冲冲”听成“九点多钟”了。弄清爽以后，两家头笑得嘴巴也合勿拢。

我屋里个沙发有点年数了，老伴个腰腿勿大活络，坐下去再立起来交关吃力，所以么，伊常常坐勒沙发浪勿想起身，要我帮伊拿物事。一天中浪，吃好中饭，老伴坐勒沙发浪困仔一歇，醒转来就喊我。我听到就到厨房间倒杯热水送过去。伊一看，马上表扬我讲：“老头子，侬今朝哪能介好啦，还主动帮我倒热水。”我看看伊讲：“刚刚勿是侬讲要我倒杯热水吗？”伊眼睛眨眨，讲：“我啥辰光讲过啦？”接下去又讲：“我醒转来发觉头发有点乱，叫侬‘到大房间帮我拿把木梳’。”结果拨我听成“到厨房间帮我倒杯热水。”弄清爽以后，两家头笑得拍手拍脚。

因为糖尿病，医生关照我甜个物事要尽量少吃。老伴出于对我个关心，怕我嘴巴馋，也跟我一道“吃苦”。一天早浪我出门去买点心，为自家买了一副大饼油条，为老伴买了两只麻球。回到屋里，老伴看到以后眼睛一亮，问我：“侬今朝哪能想着帮我买麻球啦？”“咦，是侬自家讲个呀。”老伴一听，马上讲：“我啥辰光讲过要侬带麻球啦？我是讲带两只馒头。”是我听豁边了，拿“馒头”听成“麻球”了。

因为耳朵勿好，常常拿老伴个闲话听豁边，闹出个笑话还有交关。虽然带来勿少麻烦，但也带来了勿少快乐。

我曾经为耳朵个事体看过医生。医生讲，像我搿把年纪，听力下降属于正常现象，呒啥有效个治疗办法，要我平常注意点就可以了。有啥好注意呢？有点笑声个日脚也勿错。人家讲“笑一笑，十年少”，我觉着蛮好。