跑街先生与“掮客”

◆ 储有明

老上海个十里洋场，最勿缺个就是生意人。埃歇辰光，生意人大致可分作两类：一类是“坐商”，伊拉有自家个店铺、门面搭仔字号，主要是做零售生意；另外一类是“行商”，伊拉虽然有字号，但是呒没店铺，专门做批发生意，上海人叫伊拉“掮客”。生意做得大一眼个“掮客”，往往会辣了三马路（今汉口路）个大楼里向租一间写字间，再雇几个跑街先生，就是现在个销售人员。跑街先生个日常工作，主要是辣了大马路（今南京东路）搭仔五马路（今广东路）之间个各家商铺跑来跑去谈生意。对伊拉来讲，辰光就是铜钿，所以伊拉走路勿叫“走”，而是叫“跑”。

跑街先生个穿着也有一眼讲究。要是做洋货、洋布，或者是西药、医疗器械生意个，大多数是西装革履，到了冬天伊拉会得头戴铜盆帽，外面再罩一件马裤呢大衣，就像电影《林家铺子》里向陈述扮演个“上海客人”一样。做五金生意、棉布行个，多数侪是中式打扮，穿着条纹花呢长衫配轧别丁裤子，脚浪向蹬一双黑颜色个“老K皮鞋”。迭种皮鞋最早侪是外国轮船船长穿个，鞋头是石刮铁硬，拨别人踏一脚，鞋头也勿会得瘪脱个。

山西南路南段，从九江路到福州路，过去叫“昼锦里”，曾经有一家棉布交易所。实际浪呢，迭家交易行除脱交易棉布，还做进口呢绒搭仔丝绸生意。每天一早，搿搭就是掮客搭仔跑街先生个市面了，常常有人喊：“我敲出10匹英国进口海力蒙花呢！”马上就有人呼应：“我敲进！我敲进！”喊价应价闹猛得勿得了。

上世纪30年代，有一个美国商人史密斯，提前一年从英国订仔交关呢绒，预备到美国大赚一笔。呒没想到碰着美国经济大萧条，只好转运到上海来卖。伊先辣了三马路一幢大楼里向租了一间写字间，又辣了报纸浪向登广告。结果呒没人上门接迭笔生意，伊只好带仔翻译，每天到昼锦里去做掮客。

英文史密斯是铁匠个意思，迭位史密斯先生铁算盘打得老精个，伊想学会常用个上海闲话，省脱请翻译个工钿。就问翻译：“上海闲话‘敲进敲出’是啥意思啊？”翻译告诉伊就是“买进、卖出”。后来伊又听到隔壁写字间里向几个上海人常常叫大楼里个茶房，也就是现在个物业，去“拷”老酒。茶房一歇歇就拿老酒“拷”回来了。史密斯就此认定，上海人嘴巴里个“敲”就是“买（卖）”。

有一天，史密斯做外贸单子要加夜班，写字台浪一盏台灯个灯泡坏脱了。伊就叫茶房马上到外面去“敲”电灯泡。茶房看到窗门外头有一盏路灯，灯光倒是蛮亮个，心里想，大概外国老板觉着路灯个灯光忒刺眼，要敲坏脱伊啊。但是茶房还是抖豁个对老板讲：“外面个电灯泡勿好敲个。”史密斯提高声音讲：“侬勿敲，就停侬个生意！”茶房呒没办法，拿起一根晾衣裳竹杆就去拿路灯个灯泡敲坏脱了。结果拨巡捕当场捉牢关进巡捕房。联想到当下阿拉学上海闲话，也勿能生搬硬套个。