石库门里个阁楼

◆ 侯宝良

从前上海石库门房子，进了天井是客堂，客堂上头房间叫前楼。假使前楼上头呒没造三层楼，葛末通常会利用斜坡屋顶造一间阁楼，上海人叫伊“三层阁”。三层阁中间部分约有一人高，两边高度逐渐变低，为增加三层阁个采光搭仔通风，一般会辣屋顶朝南方向开扇窗，英语是“roof”，上海人洋泾浜读译音就叫“老虎窗”。

最初个石库门房子从设计浪向来讲侪是一户一单元，从上到下一家人家。客堂间气派敞亮，是接待客人个地方。后来上海城区人口越来越多，出租房子变得有利可图。对房东来讲，客堂面积大、朝向好，假使租金开得高了，勿容易租出去，租金开得低了，房东又觉得吃亏。就有人拿客堂隔成前后两间，后间上头再搭一层阁楼，就叫“二（音ní）层阁”，为了勿占用后客堂面积，就辣原来楼梯当中地方开扇移门供人进出。二层阁斜气矮，大人辣里向立勿直，可以睏地铺或者就地坐，钻进钻出要弯腰，租金也是最便宜个。

假使客堂间是自家用个，二层阁就可以朝客堂间里开一扇窗，层高一米二以上，面积七八平方米，让小人住是相当勿错个小房间了。以前我个同学里向就有勿少人睏辣二层阁里。等小人长大要结婚了，爷娘主动睏进阁楼，客堂就成了小辈个婚房。等有了孙辈，爷娘帮忙带孙子，懂道理个小夫妻又会睏到阁楼里。由此交替，体现出代际之间个热络情感。

与低矮个“二层阁”相比，三层阁就好多了，老虎窗开大点，窗外直对天空，采光通风交关好，缺点就是离屋顶太近，冬冷夏热。我小辰光常常瞒仔大人爬出老虎窗，好奇个欣赏眼皮底下跟平常勿一样个风景，冬天辰光也会摊手摊脚睏辣屋顶瓦片浪孵太阳，享受大自然个温暖！电影《聂耳》里向，聂耳就是拿身体探到老虎窗外面拉小提琴个。记得那时候逢年过节，我就想到屋顶浪向去看闹猛，可惜搿种辰光肯定被爷娘看牢，勿可能让阿拉去爬屋顶个。

无论是二层阁，还是三层阁，虽然比勿上正式个房间住得适意，但是辣住房极度紧张个年代，倒是解决了老百姓个一时困难。再后来动迁、旧城改造、房地产开发，大批老百姓告别了低矮个阁楼，住进了煤卫齐全、有房有厅个独用套房。阁楼里向个日脚已经淡出老百姓个生活，只有阿拉搿一辈老人还会偶尔记起其中个点点滴滴。