元宵牵磨做汤团

◆小 申

讲到元宵节吃汤团，现在交关便当：冰箱里有超市买来个袋装汤团，附近点心店也有外卖。老里八早想要吃一碗汤团基本只好靠自家动手。

首先要搞到糯米粉。过年之前，凭购粮证到粮油店，糯米、糯米粉两选一。老上海人大多数欢喜买糯米回来自己磨，上海话推磨叫“牵磨”，磨粉叫“牵粉”，据说自家牵出来个糯米粉比买来个糯米粉更细洁、更软糯。牵粉前一夜，糯米要摆了水里浸泡，然后把湿糯米水和少量水灌进石磨上个洞眼里；随着手牵磨子“嘎吱嘎吱”个声音，黏稠个奶白色糯米粉浆从磨盘中间渗出来，流进扎在槽口个布袋里，接下来只要沥干布袋里个水就可以备用了。

迭能一看，石磨就是一件必备工具。记得当年阿拉屋里就有一只石磨，一到过年，就成了楼上楼下共用个器物。过年之前，要把两片沉甸甸个磨石翻出来汏清爽，看看上下磨石之间个斜纹磨槽是勿是还可以用，如果太过平滑就要请走街串巷个石匠师傅来重新凿一遍，牵粉个效果会更好一点。临近年关，迭个石磨就要辣三楼海英姆妈、两夹层小霞外婆、底楼老孙头等几家人家屋里约定日脚、来回搬用。一次，隔壁邻居借去后讲磨勿出粉来，过去一看，原来是伊拉牵磨个方向反脱了。牵磨要顺时针牵，放下去个糯米才会从进米口下去，均匀铺满磨槽，然后，上下磨石间个槽齿才会有效耦合碾磨、顺势出粉。另外，每次水米勿好放忒多、牵磨速度也勿能忒快，搿侪是使用石磨个窍门。有了糯米粉，后面做汤团就简单了。想吃甜个，就准备点“黑洋沙”做馅。想吃咸个，准备点五花肉做馅。然后用糯米粉加水，搦成面团，再擀皮、包馅、下锅煮就可以了。