春芥菜焖酱排骨

◆ 沈一珠

今年春节里，冒出来一只赤刮辣新个白相干，叫DeepSeek。第一趟练手是年初二，打进去：“大年初二，安静的新龙路，一个盲人，盲杖的敲击声。”搿几个词组是早上出门走路辰光看到个景与人。结果，DeepSeek帮我写了一篇1000字左右个小作文《盲杖声》，讲一个盲人总是数着步子辣马路浪走，伊走了10年，10年里有交关回忆，搿天，盲杖碰着了一只盒子，盒子里有只小猫……最后伊带着猫走向屋里，“那里有暖炉、有牛奶，也许还能找到那张破毛毯。雪还在下，但他的脚步不再那么冷了”。

迭能一只自说自话的白相干，阿要好白相！

想要写点顺应时令个吃食，又拿起DeepSeek迭只白相干，打进去个词组是：立春，立春故事，美食。结果，搿趟伊呒没乱发挥，规规矩矩理解了一下客户个需求，确立了两个基本面：立春传统故事搭仔美食文化。又列出三部分内容：立春传统故事、立春美食文化、立春饮食个哲学内涵。信息量蛮大，文字也蛮软熟，拣出两条可以用个：第一条，春菜，苦芥菜与排骨同煲，微苦回甘，象征“先苦后甜”；第二条，利用冬季储存食材与新春野菜搭配，体现传统饮食里向物尽其用个智慧。

总算明白一个道理，白相干迭种物事，辣了阿拉成长过程当中是一个重要角色，可以带来乐趣，促进认知、情感、身心多方面个发展，但一定要保持距离，否则，一勿当心，或许就会演绎出交关野豁豁个故事。

春芥菜焖酱排骨迭只小菜，既有DeepSeek归纳个立春美食个哲学内涵，又结合了厨房间里个烟火气——绍兴安昌酱排骨，年货结余，物尽其用；搭配春天新出个芥菜，顺应春季肝气升发，以绿色蔬菜疏肝理气。

准备春芥菜1斤左右，酱排骨半斤左右；芥菜汏清爽，沥干，切成段；酱排骨斩成小块，加料酒、生姜、糖各少许，蒸熟备用；开油镬，芥菜段摆下去，煸透；蒸熟个酱排骨连汤汁一道倒进去，翻炒均匀以后，盖镬盖，中小火焖一刻钟左右，根据自家口味，合好咸淡，盛出来就可以吃了。