春日尝鲜红菜薹

◆ 沈一珠

今朝买了恩施红菜薹，听名字就晓得，来自武汉，勿是本地菜；迭个菜阿拉小辰光勿大看见，毕竟，伊个辰光阿拉读书侪拉子弟小学，出门走五分钟就进学堂了；再有么，出小区左转走一截路有一爿烟纸店，右转走几步就是一只大饼油条摊，再过去一点就是小菜场，过过平常日脚，世界也就迭能大小了。

大概也是因为现在交通啊物流啊实在便当，所以，交关从前勿大看见个菜，现在也可以新鲜送达了，比方讲，迭个恩施红菜薹。听讲，迭个菜唐代就有了，伊个辰光侪是进贡拨皇帝吃个，老百姓侪叫伊“金殿玉菜”。有诗讲，“梅兰竹菊经霜翠，不及菜薹雪后娇”——梅兰竹菊及勿上一把红菜薹，风花雪月之余还是要民以食为天托底，迭个是硬道理。

其实菜薹迭个物事，上海本地一直有个，上海闲话叫“菜苋”，譬如白菜苋、油菜苋，所以，也可以叫伊红菜苋。从前上海人顶欢喜讲，本地菜好吃；现在想想，格局介小个闲话，多讲难为情。海纳百川就应该是只要好吃个，侪欢喜，碰着了就是福气。

红菜薹是香艳个，胭脂红个菜梗，浓得化勿开；零星有几瓣绿叶子，像煞是透露出原本个基因底子，侪是一脉相承个青菜，勿晓得哪能就恣意生长得如此艳丽；绿色个花蕾中，已经开出明晃晃个黄色小花；据说，开了花个菜薹就老了，不过倒是好看。

新鲜上市个红菜薹，当然是清炒顶高级。水里浸一浸，汏清爽，沥干，也勿用刀切，直接用手扚成1寸长短，早春个菜薹，水分足，几乎不用撕去筋筋拉拉个外皮，就好像皮肤紧绷纤嫩个小姑娘，拍个照，哪里还需要祭出磨皮功效，涂个面霜侪觉着多余，生怕凭空添出一层油腻感。

开油镬，菜摆下去，高温快炒，大道至简个调味就是加适量盐，三五分钟或到自家欢喜个口感出锅就好，或脆嫩，或酥软，惟微甜清香不变。

顶有趣个是，高温之后，香艳褪尽，出锅后，唯留一笔油画一样高级个灰绿调子。原来，春天里个花红柳绿里向，居然还有一层安安静静个高级灰做底色。