喜闻乐见滑稽戏

◆ 钱云森

滑稽戏是上海个传统喜剧形式，也是交关上海人个童年记忆。我小辰光就特别欢喜听收音机里向播放个滑稽戏，每趟听到笑嘻嘻、杨华生演个节目侪会笑痛肚皮。

我十六七岁个辰光，住辣大世界附近，经常去白相。当时大世界规定，每个礼拜一下半天休息，夜戏照演，下半天五点钟开始进场。有一趟，我看到大世界外面个海报浪向有杨华生带班个大公滑稽剧团演出《拉郎配》。有机会看现场表演，我一下子就兴奋起来，马上买票。当时搿种戏票勿是对号入座，而是先入场先选座。戏票浪向写个是夜里七点钟开演，我五点一刻进场，心里想：来得早肯定能坐到前排位子。呒没想到，进去一看，勿但座位已经坐满，走道里也立仔交关人。我只好轧辣最后一排。

演出开场，杨华生一上台，满场喝彩。他扮古代秀才，被抢去拜堂，吹吹打打闹猛，观众笑得开心。我是近视眼，又辣最后一排，为了看得清爽一点，勿得勿伸长头颈，眯起眼睛。散场个辰光头颈酸得像落枕，眼睛火辣辣，两条腿木僵僵，但是心里是真开心。

1962年7月，我响应号召去农村工作。出发前夜，我从屋里出来，想再到附近走走看看，路过金陵路西藏路口个大众剧场，看到一张大公滑稽剧团《七十二家房客》个漫画海报。海报浪，杨华生扮个伪警察喜感十足。我心想明朝就要离开上海，不如再看一场滑稽戏。我跑到售票处，看到票价分为几档：前排票八九角、后排票只要三角。可惜各档戏票已经卖光。我想等等看有勿有退票，问了几个人，发现侪是等退票个。听到剧场里个开场铃，我心里有点遗憾，正想离开，一张戏票递到眼前。有人对我讲：“票子要口伐？五排八座，九角洋钿。”位置勿推板，票价有点肉痛。想到勿晓得啥辰光再能看到杨先生个演出，我还是掏钱买票。进场验票，发现是两楼个位子，离舞台老远。不过能热热闹闹看一场滑稽戏也算值了。

到了1998年，我早已调进县城工作，某日黄昏急匆匆走过县城剧场，迎面撞见一位老先生。仔细一看，宽额角、大眼睛，正是杨华生先生。我欣喜地看着杨先生，激动得一句闲话讲勿出来。杨先生呒没一点名人架子，大约见我勿开口，等了一歇，向我点头一笑，转身进了剧场侧门。搿歇我才发现，阿拉县城个小剧场外面悬挂着一个大红条幅——“欢迎上海滑稽泰斗杨华生先生来我县演出”。真呒没想到，八十岁高龄个杨先生，还拿欢笑送到乡下来。