鳝丝遇上夜开花

◆ 沈一珠

搿段辰光，一日雨一日晴，一日春一日夏，既缠绵勿休，又一去勿回头，就好像人生。

老清老早，隔夜定个小菜就送来了，还是迭个送货爷叔，一路奔上楼，笑嘻嘻讲：侬好呀。互相问好，伊双手捧上马甲袋。开开心心接过，迭个时代样样事体变得便当，日脚也就过得惬惬意意。

买了红米苋，掐一掐梗，蛮嫩。米苋一般勿生炒，连梗带叶一道，加水，盖好镬盖，烧透仔吃，糯叽叽个。独怕菜梗硬得像铅丝，再烧也咽勿下去，所以，有交关人勿欢喜米苋。

丝瓜是本地产个，一虎口长短，刨脱皮，水光溜滑，还是从前个样子，盐水里浸一浸，炒鱼圆，青青白白，大热天里看仔开胃。

其实今朝主菜是夜开花搭仔鳝丝，鳝丝送来个辰光已经划好汏清爽了。从前买鳝丝，习惯到小菜场看师傅活杀烫熟划好，再乘新鲜拿回来炒。到了现在，侪是手机下单，送来就是处理干净，可以直接下锅炒菜个状态。想起一只笑话，侬要扛锄头去种田，总勿见得自家先去打铁咯。所以讲，要学会放过自家。

朝好里想，社会发达、先进，也体现了社会分工周到细致又科学。还有就是，现在个服务精神也是了勿起，物事勿好是可以退个呀，迭种承诺对阿拉是放心，对伊拉肯定是压力，大部分人侪是想拿事体做好个。

夜开花，甜香里带一丝苦，清火解热，刨皮切块烧汤，切片炒肉，切丝就是烧鳝糊了。迭只菜，夜开花搭鳝糊应该是互相成就，鳝丝偏贵，一般炒菜总要配点啥，算是摊薄成本。老百姓过日脚，计算太多是小家败气，勿算就是败家。夜开花烧鳝糊，夜开花清香水滑，与肥糯鲜美个鳝丝一道，荤素三七开，又经济又健康，绝对称得上是家常菜里个小清贵。

鳝丝汏清爽，切段，用料酒、生抽、盐、生粉、胡椒粉腌一腌备用；夜开花切丝，备用；开油镬，葱段、姜丝煸香，鳝丝煸到八成熟盛出来备用；再开油镬炒夜开花，煸到变透明，鳝丝摆下去，加水，烧开，滚一滚，加点糖提鲜，再加水淀粉勾芡，盛出来，趁热吃。