糖炒栗子香得来

微信扫码看视频听钱程沪语朗读

◆陈日旭

搿两天路过几家食品店，鼻头就闻到一股熟悉个香味道，用勿着想，肯定是糖炒栗子。今年夏天热得勿得了，但再热也捱勿过四季轮替，侬看呀，秋风一吹，糖炒栗子飘香，金秋个招牌就挂出来了。

糖炒栗子个香，总归会得勾起小辰光个回忆。老早住辣辣曹家渡个弄堂里，每到中秋前后，弄堂对过个食品店就会辣辣上街沿浪摆出一只炒栗子个摊头，现炒现卖。到了夜里，一根竹竿吊起一只大灯泡，照得摊头亮堂堂，一张硬板纸浪用毛笔写了六个大字：天津良乡栗子。上海人吃物事讲究产地，就像无锡水蜜桃、平湖西瓜、阳澄湖大闸蟹……后来才晓得，良乡勿辣辣天津，而是辣辣北京个房山区，但是糖炒栗子倒的确是天津个名气响。

灯光下头，一只煤炉浪搁辣辣一只老大个铁镬子，炉火熊熊，铁镬子里个栗子混着黑沙。一个赤膊大仙，头颈浪挂仔一块毛巾，拿铁锹卖力翻炒，浑身汗水拨灯光一照，亮晶晶个。摊头旁边总归会得围仔一圈人，一边等新鲜个栗子出炉，一边看表演。我姆妈路过看到，无锡闲话脱口而出：“赛过油浇葫芦呀。”

赤膊大仙掌握火候，栗子炒到八分熟，加一调羹麦芽糖，再翻炒一歇，就好起锅了。拿铁丝筛子筛脱黑沙，倒进麻袋，再装进旁边个木桶，木桶里向垫了棉垫，起到保温作用。另外一个人呢，负责称分量卖栗子。听说一锅能炒到三十几斤。埃歇辰光呒没塑料袋个，侪用牛皮纸包包，分大小包，价钿两样个。买栗子个人断断续续，毕竟老早工资低，大多数人是来看闹猛个，但弄堂里个火光、飘散个青烟搭仔空气里个甜香，就是阿拉身边最真切个市井烟火气。

我记得一等到阿爸发工资个当天黄昏，伊就会得叫我去买栗子。我捏仔钞票，蹦蹦跳跳跑到对过买一包大包栗子回来。刚刚出炉个栗子斜气烫，我只好用两只手交替拿纸包。夜里向，阿爸靠辣床横头，手指缝里夹着大前门（香烟）；姆妈坐辣床沿浪结绒线；亲娘（祖母）也会来到房间里。阿拉兄弟几家头坐辣小矮凳浪，围辣放糖炒栗子个骨牌凳旁边，耳朵听着收音机里“广播书场”个吴侬软语，嘴里吃着甜香软糯个糖炒栗子，十几平方米个房间里侪是栗子香，一家老小沉浸辣开心温馨个气氛里，覅忒乐惠哦。

星移斗转，半个多世纪一晃而过，但时光流金，岁月含香，上海人欢喜个糖炒栗子从来呒没拨光阴抛下。现在马路浪已经看勿到露天糖炒栗子个摊头了，卖糖炒栗子个店铺里侪改用电动烤箱加工，先进、自动、环保，但糖炒栗子特有个香味阿拉一直牵记辣海。讲到底，糖炒栗子勿仅是吃个物事，伊是一张帮老上海人寻回旧日记忆，寄托温馨情感个名片。