医文双绝陆士谔

◆储有明

尽管西医进上海滩已有百多年，但100年前个上海人，碰到头痛脑热，甚至疑难杂症，头一个想到个总归是请中医郎中。

搿歇辰光，上海滩有“十大名医”，其中一位叫陆士谔个，不光会切脉行医，还会写小说。当时个报纸侪讲伊“左手会切脉，右手写小说”，邪气结棍！

先讲伊“左手切脉行医”个事体。陆士谔对西洋个现代科技，还有声光电化，老感兴趣个。当时伊还没出名，病人勿多，就有空常去世界书局老板沈知方开个上海图书馆，天天看翻译过来个西洋书。

沈知方见迭个年轻医生介欢喜看书，就同意伊把诊所开勒图书馆里。来图书馆个侪是看书人，啥人晓得图书馆里会有诊所啦？沈知方就帮伊勒当时上海发行量最大个《新闻报》上登了则广告，没多久就有病家来请伊出诊了。

来个病人是位少妇，得仔“急惊疯”——先胡言乱语，后来神志不清，陷勒半昏迷状态。家属之前也请过两位名医，一位束手无策，另一位干脆讲：“准备后事吧！”

陆士谔搭伊诊脉后，也晓得病情严重，只有下猛药才有可能见效，但后果难讲：要么一命呜呼，要么立起沉疴。伊想，病人还年轻，精气血尚可扛住猛药，不妨大胆试一试！开了药方后，陆士谔怀着忐忑个心回诊所等消息，一夜侪没睡着。

第二天一早，病人家属就来了，讲服药后，前几天不通个两便侪通了，便里还有点瘀血；今朝早晨神志也清了点，讲肚皮饿，要吃粥。陆士谔再开调理个药，过了几周，病竟然全好了！从此陆士谔医名大振，辣汕头路开了家大诊所，每天门庭若市。

再讲伊“右手写小说”个本事。根据研究晚清小说最有名个专家钱杏邨讲，几千部晚清小说里，有十部最经典，其中就有《二十年目睹之怪现状》《孽海花》，搭仔陆士谔写个《新中国》。前几年，上海古籍出版社把《新中国》等十部小说当“晚清十大名著”再版，还成了当年个畅销书。

祖籍青浦个陆士谔，1910年写个《新中国》里，主人公穿越到1951年个上海，发现上海个地下有地铁贯通，黄浦江上有横跨两岸个大铁桥，上海还辣浦东办万国博览会，陆家嘴成了繁华个金融中心，连来上海个外国人也兴起学汉语热……

鲁迅先生起初辣《中国小说史略》里对《新中国》评价勿高，甚至觉得是“胡扯”。后来伊仔细研究这部小说，才晓得伊个价值，就写了封致歉信，纠正了当初个误判。