赛过一只老母鸡

◆ 沈一珠

秋天美食种类繁多，令人垂涎欲滴。

朋友海燕个老公平常管着一家大公司，不过在阿拉眼里，伊就是个顶顶欢喜烧菜，还烧得老灵个“厨神”。比方讲，伊会带碟自家腌个白萝卜来拨阿拉尝尝，哦哟，甜里带点咸，老入味个；再比方，伊会跟阿拉讲，小菜场最近有种腰子番茄，吃口老厚实；搿辰光个刀鱼嘛，味道差口气，鱼骨头也太硬；阳台种个羽衣甘蓝，应该要换营养土了；屋里呒没鸽子蛋就去买，实在呒没，用鸡蛋代替也一样……

还有次吃夜饭，台子浪一碟白果子鱼鲞有点咸，伊讲：“是水里浸个辰光不够呀！”快点倒一碟康乐醋过来，嘿，真叫化腐朽为神奇，咸味侪转成鲜味了，还老下饭！

其实细细品品，烧菜个搿些门道，跟管理公司个人才储备、抓时机、做营销、搞危机公关，好像侪能对得上号——厨房里个办法，一样能用到做事体浪向。

前几天辣海燕个画室上好课，带了几只青蟹回去，听说是刚刚从渔船上捞个，活蹦乱跳，肯定要好好烧。特意问了伊搿位“厨神”个意见，伊三言两语就讲了一种花雕酒焖青蟹个做法，听起来简单，再确认一遍，果然是大道至简。最后伊还补了句：“迭能吃，赛过一只老母鸡！”

学以致用才能进步，烧菜搿点事体弄明白了，交关事体侪能一通百通。

花雕酒焖青蟹个材料：青蟹一到两只，鸽子蛋两到三只（可以用鸡蛋代替），葱、姜、料酒、盐、糖各少许。

做法：青蟹处理干净斩成小块，放进不锈钢平底镬，加适量盐、少许糖、多些花雕酒，再放葱段、姜片，盖镬盖大火焖五分钟左右。开盖打入鸽子蛋，再焖三到五分钟就好。又鲜又补，老嗲个！