青青白白 荠菜拌地梨

◆ 沈一珠

仲春辰光，顶有特点个青头菜应该就是荠菜了，虽然，已经过脱初春时顶顶水嫩个阶段，但即将开花结籽走向成熟个迭一段，伊个香味却是顶浓个；新鲜带泥个荠菜，带根连叶汏清爽，焯过水后斩碎包荠菜馄饨，荠菜搭肉你中有我我中有你个缠绵香气，搿叫一个煞根。

配当令带泥个地梨一道冷拌，则是春天里特有个刚柔相济，绵中带爽。荠菜去根留叶，汏清爽，开水里焯一焯，冷水激一激，撩起来挣一挣（挤一挤）干，斩成小段备用；地梨去皮，开水烫一两分钟，取出也摆冷水里激一激，斩成小丁，一道装盆；淋适量盐、糖和一点点葱油，拌匀就好——之所以不用麻油，总觉着麻油个香味道有一点强横，两种味道碰辣一道，就像秀才碰着兵。

要讲短，荠菜个香味每年也只有搿能一歇歇辰光，伊是阿拉上海人记忆里个“春天信号”，更是春天里个顶级鲜头。早春二月，春雨带香，田横头上，青草地里，野荠菜随意生长；伊个香气带一股野豁豁个草木清香，像刚刚割过个青草地，有吹不散个泥土气息，不驯服，不做作，吃到嘴巴里刮辣松脆；仲春三月，香味渐浓之时，荠菜进入成熟期——春天已经来了，夏天还会远吗？转眼入夏，荠菜香气也就偃旗息鼓，且等来年。

要讲长，荠菜个香味又是绵密入心个，焯过水个荠菜，褪去生腥气，又会激发出干香菇个醇厚香气，细咂咂，也会寻着类似炒熟个松子个油脂味，越嚼越香，悠长如一部好电影、一首好听个歌。至于各种人工种植个冷冻保鲜个荠菜，除脱颜色还能保持碧绿生青之外，无论是口感还是味道，顶多也就是拥有一点点形而上个香气。

搿天早上，醒来第一桩事体还是打开手机看稀奇：一档达人秀，一群男女老少胖胖瘦瘦参差不齐个农民组成了一支合唱团，拍拍满撑满一只舞台，一个美貌女评委当场就闻着了一股泥土气，因为伊屏勿牢：咦，哪能看上去像一群农民？啥人晓得一开嗓，一个男声、一个女声，阳光明媚得像是刚刚割过个青草，而群体和声则像是广袤个大地，“……今天看起来会是美好一天，所以，拉开那窗帘吧，一年有这样一天，就足以慰藉我。”结果，辣观众更大个和声中，评委们拍一记金色按钮送迭股泥土气直接进半决赛。可见，泥土气也是蛮讨人欢喜个。