婚庆喜糖出奇制胜

◆ 王树滨

俗话讲无巧不成书，评弹里向则是“无噱不成书”。欢喜评弹个朋友侪晓得，听书最讲究品赏演员个“说噱弹唱”，其中出噱，才是一档书个出彩之处，能从日常生活里提炼出那些让人笑煞个素材才是真俊杰。

勿久前头，我乘车经过衡山路，忽然想起廿年前辣此地参加过一对新人个婚礼。千禧年初，我搭建筑学会经常来往，搭勿少建筑师成了朋友，其中有一对李氏父女，伊拉爷娘正为待字闺中个大龄千金急煞。建筑学会里一帮老朋友侪帮伊留心寻对象，一年后传来好消息，红绳牵牢了事业有成个唐律师，“唐李配”婚礼定辣当年国庆节隆重举行。

贺喜宾朋济济一堂，仪式结束后，婚事见证老杨搭我夫妻一道去附近宾馆吃婚宴，偷偷拨我讲：“等一歇拨侬一个惊喜！”刚巧碰着媒体同仁吴纪椿、陈友泉，伊拉听到后半句，忙问：“是啥惊喜？”

每到秋冬，天气转冷，我就容易伤风感冒咳嗽，搿辰光就会想起从小吃惯个润喉梨膏糖。冬去春来，有辰光去九江路人民大舞台看戏，总会辣对面“天晓得”老店买一条梨膏糖当零食。嘴巴浪讲“有病治病，无病防病”，其实就是馋了。后来九江路搭人民大舞台侪经历了改造。搿家“天晓得”老店也寻勿着了。

看官们要问了，侬前头讲婚礼，现在又扯梨膏糖，两家头有啥搭界？且听我慢慢分解：

为了勿落俗套、办出特色，老杨灵光一闪，喜糖勿买巧克力，偏偏选梨膏糖。“梨膏糖”三个字，头尾对应“李、唐”新人，中间个“膏”，可作“交”“胶”讲，暗合新婚如胶似漆个寓意。老杨一拍板，就叫准新人打车直奔南市豫园，冲进人挤人个梨膏糖店，拿柜台现货统统打包。营业员猜勿透心思，惊呼碰着稀客：“买介许多梨膏糖，派啥用场啊？”

果然，婚宴快结束个辰光，伴娘笑盈盈挨桌派发梨膏糖。来宾一开始侪迷茫，互相问：“迭个啥意思啊？”慢慢叫，大家侪猜破机关：“哦哟！李（新娘）交（膏）唐（新郎），就是谐音呀！”一时间，全场笑开了花，热闹得勿得了。用梨膏糖为婚礼增色，市面浪真个少见。

上海最早卖梨膏糖个，是城隍庙里个“朱品斋”，创建于清咸丰五年。据传朱家有祖传秘方，用料地道、配制精心，一直生意兴隆，梨膏糖搭药梨膏老受大众欢迎。起初由朱老太坐镇，伊听咳嗽声就能判断病情，对症配售特制梨膏糖。后来伊儿子朱慈兴接手，注册“朱老太”商标，还研究专制高级梨膏糖，加人参、鹿茸等贵重补品，一推出就广受好评。另外还有老城隍庙晴雪坊个“永生堂”，创办于清光绪八年。

喜糖有创意，合家欢乐也延绵。2015年，我重逢李家伯伯、伯母，看到李唐伉俪个小千金已经九岁，长得活泼可爱。我就搭杨兄开玩笑，假使要选梨膏糖个推广人，侬完全有资格。评弹迷陈友泉插话：“老杨老出噱个！现在评弹团新编书目勿大噱，伊拉一定要请侬做策划，讲出来个书才有噱、才好听！”迭个提议，引得满桌欢呼、齐声称好……