儿时饼香忆娘亲

微信扫码看视频听钱程沪语朗读

◆陈祝义

每个人一生当中总归会有一眼难忘个记忆。每逢中秋，我就会想起姆妈亲手做个月饼。

60多年前，我刚读小学。屋里日脚过得紧巴巴，侪靠姆妈精打细算。中秋前几天，好几个邻居屋里侪买了月饼。我看得眼热啊，但是也晓得自家屋里勿大可能去花钞票买月饼。

到了过节前一天，我放学了，发现屋里静悄悄个，姆妈平常下班辰光已经过脱了，但是今朝伊呒没回来。等我做好功课，天已经墨墨黑了，楼道里传来了脚步声，一歇歇姆妈拎仔一只竹篮头进门，往台子浪一放。我凑过去一看，篮头里有三只大闸蟹，还有一大块榨菜、几块豆腐干。

“今朝阿拉要开荤啦？”我开心个问。“小囡好好叫读书，其他事情覅多管。”“侬哪能舍得买大闸蟹个啦”“侪是撑脚蟹，就是拣剩下来个落脚货，等到夜快头菜场要关门了，半送半卖个便宜货呀。”我拍手叫好：“夜里可以吃蟹喽。”姆妈却卖关子：“侬想得美，我要派伊大用场个。”

姆妈边讲边拿蟹汏清爽，放辣辣蒸锅里，又拿榨菜搭豆腐干侪斩成了碎末。我年纪小，帮勿了啥个忙，草草个吃好夜饭就去困觉了。我半夜里翻了个身，迷迷糊糊看见灯光下头，姆妈坐辣辣台子旁边，低头还辣辣忙碌。

一早醒来，我心想今年肯定吃勿着月饼了，就快点吃好早饭去学堂吧。呒没想到，刚刚起床就闻到了一股葱香。台子浪摆了一盆调好个馅料，姆妈正辣辣揉面粉。

我好奇个问：“姆妈，侬辣辣忙点啥？”“前两天看人家屋里买月饼，侬阿是馋牢啦？”“我老早就勿想了，屋里呒没铜钿，想也是白想。”“店里个月饼买勿起么，姆妈就亲手做畀亻那吃呀。”姆妈指了指放辣台子浪个材料。

阿哥阿妹听了侪凑过来，搭我一样，侪半信半疑，勿晓得姆妈还会做月饼个喏。

姆妈只是淡淡一笑，催阿拉快点吃仔早饭去学堂。等到夜里，全家团聚，阿爸擦干净台子，摆好碗筷，每个人面前倒了一杯白开水，简简单单，蛮有仪式感。

呒没多少辰光，姆妈端出一盆刚刚从铁镬子里烘好个月饼。喜滋滋个叫大家尝味道。

我来煞勿及，拿起一只咬了一口。哦呦，满口咸香，斜气好吃。平常勿声勿响个阿哥也吃得连连点头，问：“迭个是啥个月饼？”

姆妈老得意个讲：“迭个是我自产自销榨菜蟹肉月饼，店里向想买也买勿着个。”

岁月匆匆，一晃几十年过去了，迭个一年个中秋，姆妈亲手烘出来个月饼，我牵记了一辈子。后来走过勿少地方，尝过各式各样个月饼，却再也呒没吃到过介打动人心个味道。