春天里，一罐椒盐虾蛄

文并图/沈一珠

朋友讲，要寄虾蛄（又叫濑尿虾）过来，“拨侬尝尝味道”。

为了证明迭个物事无可抵挡个美味诱惑，朋友专门拍了一张照片过来——春天个暖阳里，蓝天白云下头，朋友妻捧一罐虾蛄个美照。

辣搿种情景下头，电脑里放嗰是小鲜肉还是油腻爷叔勿重要了，顶要紧是罐头里个虾蛄已经见底，浓浓个香鲜味道完全可以隔仔手机屏幕喷薄而来。

所以么，定定心心坐等美味送上门。

结果，朋友又告诉我，需要再耐心等一等。

因为老板打招呼了，讲，最近捞上来个一船虾蛄太小，汏汏烧烧，肉头缩一缩，呒啥吃头了；还有，顶顶要紧个是，迭种物事卖出来，牌子要做坍脱嗰。

老板讲，具体多少辰光勿晓得，要等下一船货色上来，看看再讲。

所以么，继续等，头颈伸长仔。

想想，难得迭恁一个良心老板，肯耐得下性子，定定心心做生意。毕竟，迭个世界性子急个人还是多，像煞过脱今朝呒没明朝。

终于，礼拜天早浪，门铃叮咚响，虾蛄到门口。果然，春天是虾蛄顶好吃个辰光，肉肥，弹性老足；膏满，咬上去硬结结；手指头吮吮，各式各样个香味道，丝丝缕缕，品不清，辨还乱。

马上拍一张搿天早饭个照片拨朋友：一碟菜馒头，一罐虾蛄，一杯明前莫干黄芽，适适意意。

椒盐虾蛄个原料：虾蛄1斤左右；油、蒜、红尖椒、葱、椒盐各若干。

做法：虾蛄清水里反复冲洗，汏清爽，沥干；蒜、葱切成末，红尖椒切碎备用；镬子烧热，倒稍许油，烧到6成热，虾蛄放下去翻炒到虾变成红颜色，盛出来沥干油；汏清爽镬子，重新烧热加冷油，稍许烧热，加蒜末煸香，加红尖椒末，倒进虾蛄，加点椒盐，翻炒2、3分钟，撒葱花提香，就可以出锅了。