想起杨梅和杨梅酒

文/周允中

“杨梅要口伐黑杨梅，白沙杨梅交关赞……”小辰光春夏之交，弄堂里总会听到搿种叫卖声。俗话讲：“夏至杨梅满山红”，江南个杨梅是水果里个珍品。其中以太湖边个洞庭山、宁波慈溪、上虞一带生产个最好。洞庭山杨梅有红白两种，以白沙杨梅吃口顶好。上市少，价钿贵。

杨梅是乔木，一般有十几米高，树冠成扇形，树龄可以达到二三百年。杨梅上市个辰光比较短，小暑以后基本就呒没货了。据说商贩到产地采购，落地个果子可以随便捡，但是不允许从树浪采，因为农民担心会伤到果树。杨梅果实里可能有寄生虫个虫卵，所以必须用盐水浸泡以后再吃。

杨梅饸是我故乡宜兴个特产，每年夏至之前，满山红遍，拿几只小箩筐，叫几个小伙伴，进到山里去采摘，回来就可以大快朵颐。有辰光杨梅汁跟烂污泥沾满全身，干脆“扑通”一声跳进小溪，游泳白相，真是爽快极了。

杨梅离开果树容易变质，所以要尽快做成果汁、蜜饯，也可以用来酿酒，杨梅酒可以治疗胃气痛，痢疾拉肚子。杨梅酒个制作方法有两种：一种是直接拿杨梅放进广口玻璃瓶，倒进烧酒，再拿瓶口密封。搿种做法可以长期保存。还有一种是拿果子汏干净，去核榨汁，加少量冰糖、酒曲，让伊自然发酵。搿种酒吃口甜润勿烧心。另外，盐渍杨梅干还可以祛痰止吐。

我长大以后就拨分配到外地工作，每年回乡探亲，姆妈总要做一瓶杨梅烧酒拨我带走，吃几口杨梅酒，就一点花生、豆腐干、牛肉干，浑身温暖，心里也会涌起一股思乡情。据说吞吃杨梅核可以祛除肠子里个绒毛和毛囊，有利于畅通大便，搿种讲法勿晓得有勿有科学道理，只勿过姆妈制作杨梅酒个辰光，总会让我吞几粒杨梅核，可见辣伊心里还是蛮相信搿种讲法嗰。

《世说新语》里有一个记载。讲杨修与孔融两个人儿时遇见，互相调笑。孔融端出杨梅道：“此是君家果。”杨修回答说：“孔雀岂是你家禽。”这段笑话说明，两千多年前，杨梅已经是待客果品了。