水塘里钓鱼

文/邵天骏

我平常蛮欢喜钓鱼，迭个爱好还是从小养成嗰，有段辰光我一有空就到离屋里勿远个水塘边钓鱼。

记得第一趟钓鱼是一个温暖个春日，阳光透过百年古树密密麻麻个树叶，辣水塘个水面浪撒了勿少光斑。水塘勿大，但水面波光粼粼，动感十足，水里隐约可以看见游来游去个深褐色鲫鱼。

我辣水塘边选了一个位置坐下来，周围邪气幽静，除脱偶尔有几只麻雀飞过低鸣几声，我就好像进了一个无声世界。有几个小朋友比我先到，已经辣水塘边安顿好，侪手里拿仔钓竿一本正经辣钓鱼，看起来就像是小大人。

系鱼钩，上鱼饵，轻轻一抛，鱼饵慢慢沉进水里。一歇歇功夫，眼看有四五条鱼游过来，张开嘴巴抢食。白颜色浮标一记头往东，一记头往西，等我提起鱼竿，一条足有半斤重、活蹦乱跳个鲫鱼束手就擒。

半个多钟头过去，钓起来个鱼有了好几条，但大多数是小鱼，只好放生，反倒是其他几个小朋友，鱼篓里侪有两三条大鱼。“勿晓得伊拉是哪能钓嗰？”我思考起来。

看了看周围，伊拉选个地方侪是有水草、有树根个地方，而且每隔一段辰光，伊拉还会辣面前个水里向撒点面包屑，碎米粒，搿能一来，伊拉周围个鱼明显多起来。我心想果然是有窍门嗰！我马上看样学样，果然灵验，陆陆续续有几条大鱼上了钩。我兴奋起来，越钓越上瘾……

直到天色见晚，周围变得昏暗朦胧起来，我才注意到应该回家了，否则爷娘又要担心了。