“城市漫步”搭仔荡马路

文/赵妃蓉

最近“城市漫步”（City Walk）辣上海特别流行，一群年轻人有目的有计划个行走辣某一条城市路线上，可以以美食、建筑、文化历史作为主题，串起整条线路。城市漫步，注重个是旅游体验，走走停停，才能看到城市背后个风貌，体验风土人情搭仔城市文化。一直辣上海个居民可以增加对迭座城市个认识，外地来上海旅游个可以有另一个视角深入了解上海。

迭种城市轻旅行个方式总归让我想起老底子个荡马路，三四十年前个电影如果展现男女主人公谈朋友，最常见个场景就是小伙子推一部脚踏车，小姑娘跟辣旁边。繁茂个梧桐树下，伴着黄浦江开阔江面个外滩旁边，月光映照下旖旎个夜色中，迭些场景侪特别适合展现男女主人公个情意绵绵。至于到底路过多少风景，数过多少电线木头，当事人实际浪向心里勿是老清爽嗰，有试探个辰光心里个忐忑，也有等待对方回应个辰光心里向个搭搭动，当然也有两情相悦时个心花怒放……前几年长篇评弹《高博文说繁花》上演个辰光，就有记者评论“仿佛感觉大上海就在戏中沪生和梅瑞谈恋爱逛马路个脚步中走遍了”。

还有一种荡马路就是几个小姐妹一道Window Shopping（橱窗购物），呒没具体个购物目标，就沿仔马路兜兜看看，望望野眼。老早个淮海路特别适合荡马路，有树有花有总归走辣时代前列个橱窗设计，有大家侪晓得个老字号，还有打弯就是另一番天地个柳林路、华亭路小商品市场。勿像现在好像侪被大牌个超大屏幕占领了视线，高大上是足够了，但是个人感觉呒没老早好白相，大概只有到食品商店里买点芝麻核桃粉还算有底气。

现在荡马路视觉浪向最有满足感个应该是临近年底辰光，各大商场侪铆足劲道要捺商场个门面搭仔大厅布置得富丽堂皇、流光溢彩。LED灯带让光色显得更加柔和，让迭些地方一刹那间就变成了造梦空间，让人忘记脱现实生活中个勿开心，心怀希望走向新年。走辣马路浪向，扑面而来个侪是大家喜气洋洋个表情，空气好像也变得温暖起来，迭种荡马路让阿拉对新年个迎接更加有仪式感搭仔氛围感。

迎来送往，一年又一年，岁月就像流水一样悄悄流逝了，每年年底个荡马路就像是帮岁月留下一个印记，等年纪大了回想起来还是有交关多美好个辰光曾经经过阿拉个生命……