秋个梨，润个汤

文并图/沈一珠

处暑已过，酷热难熬个天气到了尾声，凉爽个初秋就要华丽登场了。《月令七十二候集解》说：“处，去也，暑气至此而止矣。”表明炎热暑天即将过去。勿过么，暑热消退是有一个过程个，天气勿会马上就变得凉爽，真正开始有凉意一般要到白露以后。

从春天个万物初萌到夏天个恣意生长，日脚过到搿歇辰光，要收一收拢揫一揫紧，要注意安神静心，切忌心情大起大落。再到大冷天辰光，就记得更加要团一团，囥一囥了。感谢老天爷安排了一年四季，也让人学一学收放自如个大道理。人个一生大抵也如一年四季。

老清老早，去医院帮老妈配好药，出门左手转弯就是七宝老街。辰光早，游客稀稀拉拉，可以笃笃定定看一看荡一荡。先到酱菜店买点酱瓜、乳腐；再朝里走，是原生态个小菜场，乱是有眼乱，好在样样物事新鲜，河虾只只活，排骨也是热气个——热气肉是老底子个讲法，意思是呒没冰冻过。

呵呵，巧也真是巧，吃药与吃食居然侪勒同一条七宝老街浪向，老祖宗也没想到，药食同源迭个词新解得迭能严丝合缝。生活赞得来。

排骨汤，用刚刚买个热气肋排半斤，上海蜜梨1只，配中药材石斛，玉竹各30克。

排骨焯水，蜜梨去芯切块。汤镬子里倒水烧开，肋排、梨块及石斛、玉竹一道摆下去，大火烧开小火炖40分钟左右，加盐合好味道就好吃了。

特别抄一句关于梨个药理，《本草备要》讲，梨“甘微酸寒、润肺凉心、消痰降火、止渴解酒、利大小肠”，而石斛滋阴清热，玉竹补中益气润心肺。所以，迭份排骨汤看看简单，实则是秋天里个保健汤。

好吃物事是顶好个药。