搿歇辰光正好吃栗子

文/侯宝良

有人讲：“西风起蟹脚痒”，是吃螃蟹个辰光。其实西风起，好吃个物事多了去，天气冷了，弄眼热烘烘个糖炒栗子吃吃，覅忒适意噢。

侪晓得上海滩浪新长发个糖炒栗子最出名，原来开辣成都北路、延安中路口搿爿门面勿大个“栗子大王”新长发果品店，伊炒出个“桂花糖炒栗子”，以卖相油光、吃口香而久负盛名。据说搿家店是从1935年一家前店后作坊式个小店做起嗰，后来虽因南北高架个拆迁受到一眼影响，仍旧发展出勿少连锁店。到了现在，店龄八十几年个“新长发”已经是名副其实个“中华老字号”了。

以前过了中秋，阿拉兜到淮海路成都路口，总会拨附近延安路浪迭家店飘来个糖炒栗子香味吸引过去。排队辰光就看到两个围仔大镬子轮番转圈翻炒个人，镬子里黑色细石粒混着油亮棕色个板栗。两个人嘴巴里还勿停叫卖：“糖炒栗子香又香，吃了栗子人登样。小伙子吃了有卖相，小妹一吃就漂亮。老妈妈来吃做娘娘，老伯伯想吃要识相。”看伊拉搿种油腔滑调又勿觉着吃力个样子就像看电影《红高粱》里酿酒人个憨腔，勿由觉得好笑。哎，吃搿里炒出个栗子味道真勿一样，肉质紧有嚼劲满嘴干香，甜味渗到栗子里，又香又甜覅忒赞哦。比较下来，的确比阿拉屋里隔壁老王摊头浪个炒栗子好吃。

小辰光，邻居老王夫妻俩辣马路对面个路口摆摊头，平常日脚做水果生意，西北风刮起以后，就用柏油桶改装个柴爿炉做起糖炒栗子个生意。后来，老王个身体越来越差，做勿动体力活，就请出乡下几个侄子来帮忙。生意好个辰光，夜快头辣竹竿浪搭起架子挂上灯泡挑灯夜战，夜里头更是烟雾腾腾人声闹猛。只苦了沿街邻居，栗子吃勿着，糖焦味是熏足。勿过，倒也呒没啥人去投诉伊拉，反而同情伊拉赚钞票勿容易。老王也蛮知趣，邻居路过伊个摊头，伊也经常客气个拿眼栗子拨大家尝尝，算是谢谢大家关照。可见埃歇个邻居关系还是相当融洽嗰。

现在是看勿见手工炒栗子了。看看油光锃亮个糖炒栗子，有人还担心吃到被石蜡打扮过嗰。葛末我建议大家勿妨买眼生板栗来烧菜，像栗子红烧肉，保证吃客先吃栗子再吃肉；还有栗子烧鸡块，勿论清炒还是红烧，味道侪老赞嗰。栗子捣成泥又可以做栗子酥饼咾啥。“西风起栗子香”，到了现在搿个节气，覅错过搿种时令美味哦。