技术员个台子

文/赵韩德

前一抢去公司设计部门，看到里向工作人员侪辣辣一个个隔开个半独立空间里工作，每人一台电脑，画总体布置图、系统原理图、安装图、装配图、零件图侪有相应个软件，只要用鼠标辣电脑浪向画出轮廓，标出参数，一张图纸就做好了，打印出来个图纸就像精美个印刷品，赏心悦目。

老早仔技术人员个工作台完全不是搿种样子嗰。

首先，伊拉个台面侪是斜嗰，前低后高，有一个坡度，搿是因为要辣办公桌浪放一块绘图板，绘图板需要恰当个角度才能便于操作。

绘图板上必然有一把横贯板面个丁字尺，垂直跟水平保持直角。配合丁字尺，是几把三角板、曲线板。笔筒里，则是中华牌4B绘图铅笔、圆规、描图笔……林林总总一大堆。辣辣所有迭眼物事之上，放辣绘图板顶端嗰，是宽而扁个计算尺、三角形个比例尺。现在常见个计算器辣埃歇辰光是呒没嗰，碰着数学计算就需要使用计算尺——通过拉动游标读取刻度来完成复杂计算个工具。计算尺用个日脚长了，表面会发黄，刻度线也会变得模糊，所以，只要看台面浪向个计算尺，就可以估量出对方做技术工作个经历。计算尺赤刮辣新嗰，一般就是刚入门个见习技术员。

我个师傅蒋工还有几样宝贝：一副老光眼镜、一副游标卡尺、一把钢皮尺。台角浪还有一只装有螺旋千分尺个盒头。老光眼镜，凡是年纪大个工程师一般侪是要用嗰，但是游标卡尺和千分尺，现在交关技术员就勿一定随身带了，少部分人甚至用勿大来。师傅蒋工使用起迭些工具就像吃饭用筷子，绝对得心应手。

当时阿拉技术组主要是配合修船部现场修船，经常会碰着零部件损坏需要更换，但是迭些零部件往往呒没地方可以买，只好按照实际情况进行测绘，然后制作替换件。迭个就邪气考验技术人员个测绘能力了。因为蒋工技术好，有辰光来寻伊个人川流不息。蒋工通常来者不拒，笑嘻嘻戴上眼镜，先拿损坏个零件前后上下观察一番，再用揩布仔仔细细揩清爽，然后就是冷静细心个卡尺测量，有辰光还用千分尺复核。最后，直接用钢笔辣图纸

浪画出草图，注明尺寸、公差、光洁度、材料等，工人师傅就去加工，从来不出问题。当时车间默许可以按草图加工嗰，只有蒋工。后来相当长一段辰光里，蒋工搿手本事成了我努力个方向。