两条被面子

文/王志良

礼拜天陪家子婆到南京路步行街去，经过老介福商店，我对家子婆讲，侬还记得阿拉结婚辰光，姆妈帮阿拉买被面搿桩事体口伐。

埃歇辰光，我屋里经济条件勿好，结婚前只买了一套家具，其他一样呒没买，更勿要谈买冰箱、彩电、洗衣机等家用电器。好在女朋友并勿嫌弃，除脱传统嫁妆一应俱全，连新房里向所有个家用电器侪是伊买嗰。勿过，伊有一个特点，买物事特别挑剔，勿中意个勿买。到离办喜事还有两个礼拜个辰光，还差两条被面呒没买。为了搿桩事体，我陪伊专门跑了好几趟商店，可惜要么价钿太贵，要么颜色、花色勿好，就是看勿中。

眼看离预定个婚礼越来越近，我也勿由得急了起来。一天，岳母对我讲，侬陪我到南京东路老介福呢绒绸缎商店去一趟。埃歇辰光，老介福是上海少数专业经营真丝、绸缎、呢绒等高档布料个名店之一。到了店里，岳母拣了两条颜色最鲜艳、花朵最漂亮个织锦缎被面，一条图案是龙

凤呈祥，另一条是鸳鸯戏水。搿能两条被面就要70块左右，差勿多相当于我两个月工资。我勿好意思让岳母出介许多钞票，就想换便宜一点嗰，岳母却对我说：一生一世就结一趟婚，物事当然要好点，再讲搿两条被面寓意邪气好，一条代表婚后生活如意，一条代表阿拉两家头相亲相爱，所以一点也勿贵。以后亻那两家头个婚后生活一定会芝麻开花节节高……三十多年过去了，岳母离开阿拉也有十多年了，阿拉屋里真个就像岳母当年讲嗰，一年比一年好。女儿大学毕业进了一家大企业，从事自家喜欢个事业。我与家子婆退休以后也有足够个养老金。勿过，勿管屋里向变化有多大，迭两条由岳母出钞票买个织锦缎被面一直被我囥了箱子里舍勿得用，每趟看到伊拉就会想起当年岳母陪我去买被面个情景，感受到长辈对阿拉小辈个期许和关爱。生活中有种感情是值得一辈子铭记嗰。