好朋友与好味道

文/沈一珠

第一趟吃石斛，还是辣了五六年前头，一次茶会浪。大家好茶好聊，结果主人又拿出一把细细长长、长得像草茎一样个物事，分拨大家尝尝味道，讲是云南野生石斛。

辰光过去蛮长了，倒是还记得当时个味道：泡了吃，汤淡如水，有点香气。末脚辰光，主人告诉大家，拿剪碎个石斛摆了嘴巴里嚼一嚼，有黏结结个浆汁出来，越嚼越黏。

一来二去，跟办茶会个两位主人就成了朋友。近朱者赤，所以，吃茶能力也见长了。从前只晓得，一到大热天，单位里发个是绿茶；到港式茶餐厅吃到个，有辰光还有一点点霉蒙气个，是普洱茶。现在还晓得，熟普醇厚，比较养胃；生普相对凛冽一眼，蛮刮油水……

今年夏秋交替个辰光，天气忽冷忽热，像跳橡皮筋，一勿当心着仔冷，伤风了，发寒热、溻鼻涕、咳嗽老三样。之后，就感觉喉咙里好像总有口痰吐勿出来，牵丝攀藤。

一天去寻老朋友买茶叶，结果就被伊发觉了，伊讲：过两天会来一点野生紫皮石斛，匀一半拨侬。

礼重情义重！所以，搿几天，我日日跟石斛打交道：

夜里，拿三四根尺把长个紫皮石斛细细剪碎，摆了炖盅里，用纯净水浸20分钟，然后隔水蒸40分钟。稍许冷一冷，倒出来，看一眼，带一眼紫气个石榴红，实在漂亮；吃一口，有蜜香，斜气清爽。

早浪，大米一小罐，淘清爽；隔日夜里炖过一潽个石斛一道摆进去，笃40分钟左右；盛出来，白粥里隐隐带点淡雪青颜色，米香里夹石斛香气，配两小块麻油白腐乳。

到中浪，半斤肋排水里焯清爽，还是四五根石斛，剪碎，摆进去，大火烧开，小火炖40分钟左右。迭能一碗肉汤，一眼呒没烟火气。

虽然勿晓得搿种吃法对身体有啥效果，但是总归迭能想，人生当中，只要有好朋友，就有好滋味。