小辰光看“西洋景”

文/严志清

“西洋景”，也叫“西洋镜”，是老早民间文化娱乐活动个一种设施：一只一米多高、两米多宽个木柜，木柜安放辣一只同写字台一样高个架子浪。辣木柜前面个板浪向开了几只洞，每只洞浪侪装了一片碗口大小个放大镜，木柜后面个底板浪有交关画片排得整整齐齐。木柜前面放几只小木凳，买了票个人可以坐辣凳子浪通过放大镜看里向个画片。放西洋景个人一面推拉画片，一面向大家介绍每幅画片个内容，讲起来口若悬河，滔滔勿绝，添油加醋，拿画片里个内容讲得精彩生动，引得周围小朋友侪心里痒痒嗰，总想要看一看。

我小辰光也特别欢喜看“西洋景”，只要听到附近马路浪来了放西洋景个摊头，总想马上奔出去看。记得当时看一套画片大概要一角洋钿。画片有多有少，少嗰有十几幅，多个廿几幅。每幅画个面积勿大，但通过放大镜，看起来就勿觉得小了，有种画片里个场面甚至显得相当有气势，让人感觉身临其境，所以百看勿厌。

后来，有人将交关中国古典小说个故事，如水浒、三国演义、西游记、说岳全传、三侠五义、说唐全传，二十四孝等等，全部画成连环画，上了“西洋景”。埃歇辰光，我特别欢喜看“岳飞枪挑小梁王”“岳飞大败金兀术”搭仔“武松景阳岗打虎”个故事，每个故事侪看过三四遍，能讲拨小伙伴们听。

后来我读小学四年级个辰光，有一趟班级里组织讲故事比赛，一共有7个同学报名，我也自告奋勇报名参加。比赛辰光，我就讲了“武松打虎”个故事。结果因为讲得生动，得了第一名。从此以后，看西洋景就更加起劲了。

有个俗语叫作“拆穿西洋景”，意思是西洋景呒没啥奥妙，只勿过是拉动一连串画片，使画面浪个场景看起来像辣活动，拆穿了就呒啥稀奇了。就像上海大世界里个“哈哈镜”，只是镜面凹凸，照出来个样子就变得怪里怪气一样，呒没啥奥秘。只勿过埃歇辰光小朋友可以参加个娱乐活动勿多，搿种西洋景就成了小囡特别喜欢个宝贝。