“蹲辣屋里”结“燕子”

文/许德华

今年春节本来计划到热带地区旅游，看看勿一样个风景，呒没想到“计划赶勿上变化”，碰着一场新冠肺炎疫情，乃末只好歇搁，自家“禁足”辣屋里向。

像绝大多数上海男人一样，我先生搿段辰光“速成”“马大嫂（买汏烧）”，我倒“享福”了，看书写字，还拾起了掼脱好几年个结绒线生活。覅小看结绒线，伊能灵活手节头、锻炼记忆力。至于绒线啥地方来个，还要从几年前讲起。

几年前我还呒没退休，有趟路过一家绒线店，看到橱窗里摆了交关好看个绒线衫就立停看仔一歇，结果店家就招呼我进去坐一歇。进去一看，店里有好几个年龄差不多个姐妹道伴，手里侪拿了五颜六色个绒线辣结，原来搿爿店做“DIY”生意兼卖绒线。其中有一个人结个是“燕子花”小人套衫，我看了感觉邪气亲切，所以离开个辰光，我顺手买了一团绛红色个山羊绒线。

我妹妹小辰光穿个绒线衫侪是我结嗰。第一次结嗰就是燕子花用个膨体绒线。搿种绒线颜色好，分量比全毛绒线轻，葛咾一斤膨体绒线就可以结一套小人衣裳。我姆妈工作忙，所以买绒线、结绒线侪是我主动向邻居阿姨学嗰。我觉得帮姆妈做家务蛮开心额。

一晃退休三四年，我热衷于旅游、徒步、观鸟等户外运动。葛歇老百姓生活条件好了，老早大家眼热个羊毛衫也看勿上眼了。邻舍隔壁欢喜结绒线个人也看勿到了。倒是我退休以后读个上海市老年大学，有“家政系”下设“编结（棒针）、编结（钩针）、工艺编结”三个班。哈，结绒线成了一门学问啦！伊拉还经常展示学员作品，我去看过，灵得勿得了！但是我总归呒没静下来结绒线。

搿趟抗新冠肺炎，对阿拉来讲“家里蹲”就是最好表现。乃末寻出山羊绒线，翻出老早上海工艺美术研究室编个《绒线花色编结》，从书浪上挑花样。像实心花：以横、条纹、菱格等几何图案为主，适合用粗绒线结，厚实保暖。篓空花：以几何图案搭仔花卉图案为主，一般用细绒线编结，适合女式春秋衫搭仔小囡衣裳，也可以结围巾。配色花：要用两种颜色绒线编结，比较复杂。最后想想，还是结“镂空花”比较实惠，乃末回转头再翻，树叶子花、水草花、珍珠米花咾啥交关，但是总归觉得还是老早结过个“燕子花”好看。搿本书浪上呒没燕子花，凭我第一次结绒线赛过“初恋”个记忆：两行6针上针，中间放3针；第二遍拿放针左右挑牢结。一只只小燕子就迭能像模像样“飞”出来了。

静心，坚守，自家动手结一件燕子花背心，就像开心个小燕子迎接春天！