竹林里个珠颈斑鸠

文/丁迪蒙

年初五早浪，我看见一只灰褐色个小鸟停留辣楼顶个袖珍竹林里。我凑近玻璃门细看，伊也盯牢我看，一点呒没要逃走个意思。

平常也有小鸟会辣搿搭停一歇，但只要我一凑近，马上就会逃走。搿只小鸟为啥搭我“相看两不厌”呢？仔细一看，伊个身体下头有只小小个窠。晓得了，伊是辣孵小鸟！伊是只啥个鸟呢？拍了几张照片晒辣朋友圈里。一歇歇就有了回音，原来是珠颈斑鸠，又叫珍珠斑鸠。对我来讲，晓得伊是斑鸠就可以了。既然伊选择辣我屋里做“舍姆”，我就来做“月嫂”好了。

搿天以后，我有空就会去看看伊。比如平常每天早浪七八点钟，我会去屋顶浪个阳光房为花花草草浇浇水，松松土。现在我会先去看伊懒洋洋趴辣窠里，搭伊打声招呼：“哈罗！宝贝！”下半天三四点钟，我会去阳光房里晒晒太阳，吃杯茶，顺便搭伊讲讲闲话：“哎，侬先生哪能勿来看看侬啊？”“侬觉着孤单口伐？”

伊朝我眨眨眼睛，一声勿响。可能，我问得忒过分了？

伊也并勿是完全勿动，每隔十来分钟，就会挪动挪动身体。刚刚还是头对牢我，一个转身，就发现只好看伊个尾巴了。再等一歇，又看见伊个侧面了。有辰光，伊还会从窠里飞出来，立辣竹头浪向，伸伸头颈，甩甩尾巴，拍拍翅膀。噢，伊是辣舒展身体、活动筋骨呀。整日整夜趴辣海肯定邪气勿适意，做姆妈真是勿容易！

勿知勿觉十几天过去了。一天早浪，我刚刚吃过早饭，就听见女儿个喊声：“姆妈！鸟窠歪脱了，鸟呒没了！”急急忙忙上去看，勿看见雌鸟，鸟窠已经倾斜，地浪还有一只碎脱个蛋壳。

第二天，我拿歪脱个鸟窠拆脱，期待再有“小精灵”来小竹林里筑窠，让我继续当“月嫂”。