苦瓜虾仁蛋花汤

文并图/沈一珠

蛮长辰光勿出门了，我是指，勿出小区门。房门还是要出嗰。因为，总要透透气，走走路，买点新鲜小菜咾啥。

小区里搿对卖菜个小夫妻是安徽来嗰，开了一家小店，卖油盐酱醋，也卖新鲜蔬菜，肉鱼虾蟹。搿腔里，做生意要学会应对疫情，伊拉也蛮用心。比方讲，勿戴口罩，是勿拨进门嗰；再比方讲，门口准备了一次性手套，请大家戴好手套拿小菜。就是店里地方小了一眼，排队要排成欧洲模式是呒没可能性了。所以，去一趟，多买点，囤两天。

囤菜个好处当然是安全，坏处就是勿新鲜。比方讲，前两天买个苦瓜，买个辰光碧绿生青，摆仔一天，就有点发黄了。为了防止伊一路里黄下去，最后变成一只金光闪闪个“黄金瓜”，决定立即拿伊处理脱。

葛末哪能处理呢？考虑到伊有点脱水有点老，索介烧汤，拿伊浸辣水里。

先是拿伊切片。我个窍门是，拿苦瓜竖起来，像削甘蔗皮一样削。只勿过削个深浅要控制好，削得太深，带了芯子，味道老苦嗰；削得太薄，又有点浪费。现在辰光，买点新鲜小菜勿容易，要做人家点。苦瓜水嫩，搓盐辰光勿好穷凶极恶，要温柔点。苦瓜摆辣碗里，撒点盐进去，轻轻交抖一抖、翻一翻，腌几分钟；再用开水焯一焯，冷水激一激。然后拿大虾仁一把，去脱沙筋，用盐、生粉、黄酒一道捏一捏；一只鸡蛋，辣碗里打

匀；一只蛋够了，就是想有点蛋花个气氛而已。

最后，汤镬子里倒两碗鸡汤，烧开，苦瓜、虾仁摆下去，等汤再烧滚以后，蛋液绕圈子，慢慢倒下去，再拿火关脱，就好了。我一般就勿再摆盐了，因为鸡汤、苦瓜、虾仁已经侪有咸味道了。

就迭能一碗苦瓜汤，绿是绿，黄是黄，隐隐约约个是粉嗒嗒个虾仁，老开胃个颜色。

当然，呒没鸡汤，用白开水也是可以嗰。只勿过，味道是要推板一眼眼嗰。