曾背布袋游瑞士

文/钱红春

现在旅游已经是阿拉退休生活个一部分，就是去国外也是一桩邪气平常个事体。我老早出去旅游，侪习惯背双肩包。双肩包勿但容量大，而且可以用两只肩胛分担重量，更加适合走路爬山。

前一抢到瑞士去旅游，老伴辣做准备工作个辰光问我随身要背啥个包，伊明明晓得个事体，做啥还要问呢？原来，搿趟旅行社辣出发前个说明会里向，建议大家尽量勿要背双肩包，就算要背，也勿要背辣背后，要移到前胸，防止拨小偷偷脱重要物事。

搿个提醒也是蛮及时嗰，现在外国也勿太平。记得有趟到英国旅游，有位“驴友”夜里出去，路浪向碰着假警察，要伊拿所有物事掏出来检查。幸亏当时有会得讲英语个导游辣辣边浪，要求伊拉出示证件并表示要向警署查询，假警察才“拆穿西洋镜”，灰溜溜跑脱。前年到德国旅游，旅行社安排了一个华裔德籍导游，伊为了提高大家个警惕，讲伊有趟到法国巴黎出差，等办好事体回来，放辣车浪个包勿见脱了，问司机，司机讲勿晓得，总共损失脱几千欧元。大家问伊做啥勿报警？伊讲，报警也呒没用，根本就查勿着，只好当作自家触霉头。

我随手指指挂辣椅背浪个布袋，讲：“就背搿只！”

搿只布袋，样子同“阿姨妈妈”们去菜场，到超市背个环保袋差勿多，但料作是邪气牢个本色细帆布，袋口当中有只揿钮，两根同样料作个布带拎襻比较长，手拎肩背侪可以，邪气牢。搿只布袋是儿子单位用来装慰问品发嗰。后来我每趟出门侪背搿只布袋。

旅游团当中就数我同老伴年纪大，虽然反应迟钝，但我背仔搿只平平常常个布袋，从来呒没拨“三只手”盯牢过，两家头轻轻松松，太太平平游完全程。其实，我搿只布袋里向有我同老伴个护照，有手机、现金搭仔信用卡，有帮老伴买个手表，还有瓶装水和纸巾，物事蛮多，算算钞票也勿少。倒是旅行团里一位女士背了一只真皮双肩包，辣辣因特拉肯小镇火车站出站个辰光，拨两个女扒手盯牢，一个掩护，另一个就偷偷解开双肩包个绳结，还好拨跟辣后头个同伴发觉，及时提醒，才呒没遭殃。

难怪辣辣瑞士个火车站，饭店个门浪，侪有“谨防扒手”个图标或者中文提示。