小鲍，简简单单个味道

文并图/沈一珠

早两年，辣饭店里吃一只小鲍，算是上档次嗰。

饭店里个烧法，一律是让人摸勿着头脑个“密制”，最后，一只简简单单个小鲍，会被复复杂杂个味道包牢仔，摆辣一只小盅子里端上来。一边吃，一边也会疑惑：是高汤成就了鲍鱼个鲜香呢，还是鲍鱼成就了高汤个香鲜？

去年春天末脚两天，到日本去白相仔几天，辣一家饭店里也有鲍鱼，伊拉个吃法就比较素白了，摒勿牢啰嗦一句，个人感觉日本人吃物事，是有点阿拉小辰光白相像过家家游戏，一只虾，一只鱼丸，就可以端出来了，喏，眼门前迭只小鲍，汏清爽仔，连壳摆辣一只小碟子里，旁边一只酒精小炉子浪炖了一只加了清汤个小盅。

我刚刚想去碰迭只小鲍，一个阿婆服务员，像一阵风一样过来了，一连串闲话加手势，伊帮我拿小鲍摆进炖盅里，意思是，稍许炖一歇，再吃。

反正吃物事迭眼事体，简单起来也简单，几分钟之后，小鲍搛出来，芥茉酱油蘸蘸，塞进嘴巴。阿婆呒没再冲过来，基本浪就算呒没做错啥事体了。

附近生鲜店里搿两天也有小鲍供应，合下来，大约五块洋钿一只。下单，一刻钟，五只小鲍就新新鲜鲜送到了。

接下来个做法邪气简单，原料只有三样：小鲍、清水、生抽。

做法也只有三步：首先，小鲍汏清爽，表面划几刀，按侬自家欢喜的花纹；其次，小鲍壳也汏清爽，小鲍再摆进去，辣盆子里排齐，隔水蒸5分钟左右；最后，先覅急了开盖，闷个两三分钟，再拎出来就可以了。吃个辰光蘸一点点生抽，是清清爽爽个鲜味道。

一边吃，一边像煞又看见去年碰着个日本阿婆服务员，辛苦又开开心心个样子。搿两天，阿婆勿晓得还辣忙口伐？