修修补补过日脚

文/管 弢

上海人过日脚，一直节约来兮。“72家房客”时代，大家侪有一种共识——能修则修，能补则补，绝不浪费，就像小辰光那首儿歌：“我有一双万能个手，样样事体侪会做……”

当年弄堂里经常会听到修理师傅个“独唱”：“修阳伞啰——”“削刀磨剪刀——”“箍桶哦——”还有一群群个小囡团辣师傅周围看“西洋镜”，看个次数多了也侪晓得了一眼门道。

箍桶一般是辣春末夏初，经过一个冬季，热胀冷缩引起木桶浪个木板收缩，到了天热用木桶汏浴之前，请师傅拿木板重新箍紧，再用桐油石灰镶嵌，才能保证木桶不漏水。考究一点个人家，还会涂一层清漆，修好个木盆就像新个一样。箍桶师傅来个辰光，弄堂里各种大大小小个木桶摆辣一道就像一场博览会，对阿拉搿点小囡来讲，搿就预示着有西瓜、冷饮、暑假个夏天就要来了。

我最敬佩个要数补碗师傅，埃歇辰光瓷碗一豁两爿照样可以修补好。补碗师傅先像拉胡琴一样辣碗两边分别打洞，用锔钉拿破裂个瓷片订辣一道，称为“锔瓷”。每次修补结束，补碗师傅还会用补好个碗向主人讨碗水喝，表示滴水勿漏。我就有一只补过个瓷碗一直用到读大学，只因为欢喜碗浪个一只小猫图案。

我最不喜欢看个是补搪瓷。当时大多数人家屋里侪有交关搪瓷器具，比如搪瓷盆、搪瓷杯、搪瓷碗、搪瓷痰盂罐等等，搪瓷器具个主要缺点是表面搪瓷层容易碰坏，里向个铁皮露出来容易锈烂。修理师傅来了，先辣破洞个地方垫一小块白铁皮，用焊锡补漏，再用锉刀锉平，砂皮磨光，最后涂一层颜色相近个搪瓷涂料，等涂料干了，看上去就像新个一样。因为搿种涂料会散发一种怪味道，我总是远远交避开。

还有一眼修补耗时比较长，比如修棕棚、弹棉花等等，阿拉小囡就呒没心思围观细看了。

除脱以上搿点需要特

殊材料和技巧个修补要寻专

门个修补师傅来做，还有交关

日常修补阿拉上海人是自家动

手嗰。我小辰光邪气调皮，放学以后辣弄堂里踢皮球，结果不当心拿马家婆婆屋里个窗玻璃踢碎了。周末阿爸量好尺寸，配来玻璃，四面用钉子固定，用油灰一嵌，钢皮尺一刮，马上焕然一新。至于换保险丝、修拉链、补脚踏车轮胎等等，侪是阿拉上海男人个拿手生活。

上海女人勿但是过日脚个好手，也是修修补补个行家。埃歇辰光有一个顺口溜：“新三年旧三年，缝缝补补又三年。”一件衣裳要穿上好几年。我就有一件罩衫，是用姆妈个大衣改个，后来袖口破了，再剪成背心拨表妹。我个同桌毛头辣屋里排行老五，前面四个侪是阿姐，阿大个衣裳穿不落，拨阿二穿；阿二穿不落了，轮到阿三……最后缝缝补补拨毛头，弄得迭个男小囡只看衣裳像“妹妹”。

弄堂是个小世界，平常经常能看到三三二二个阿婆阿姨围坐辣一道，一边手里做生活一边聊天，有结绒线个、有纳鞋底个、有缝补衣裳个……当年屋里用个台布、窗帘、购物袋、沙发垫、枕头套侪是辣“茄山河”个辰光完成个。

现在各种日用品侪能轻易买到，单纯延长用品个“寿命”已经完全呒没必要了，但勿少物事背后会有特别个人和事，睹物可以思人，睹物可以忆事，所以我有辰光还是会怀念修修补补个日脚。