白相可以是一种学习

文/赵妃蓉

前一枪各个学堂侪开学了，学生子侪回到了课堂里，家长们戏称“神兽归笼”。有心理专家提醒家长，辣送小朋友去学堂个辰光，勿要表现得太开心，否则会让小朋友心理勿平衡。我觉得之所以会有搿种讲法，就是因为现在小朋友辣学堂里向个学习压力实在太大了，其实除脱学书本浪个知识，各种兴趣爱好和交往能力也是需要辣学堂里培养嗰。

阿拉小辰光，学堂里该上课个辰光，老师当然是老认真讲课嗰，但是课余辰光还有不少兴趣小组，从绣花、裁剪到做手工、种花草，再到活动课浪向个各种文体活动项目。放学辰光，大家经常是依依不舍离开学堂嗰。

我记得上绣花课个辰光，老师让阿拉每人准备一只绷架，然后拿棉布或丝绸布用绷架绷好，再用铅笔画纹样（如果面料通透性好，就可以像描红一样拿纹样描下来），然后就是按照纹样搭配勿同颜色个丝线。最后，辣真正动手绣花之前，还有一项重要工作——拿丝线劈线，阿拉搿点小朋友刚刚开始学，顶多拿一根线劈成两股丝，据说专业个绣花老师傅，有本事拿一根线劈成36根丝。丝线劈好就可以开始绣了，我一开始比较心急，结果一勿当心就会刺到手，绣出来个针脚也疏密勿均。再后来，通过绣花，我学会了让自家静心、专注个方法，搿种方法可以讲让我受用一生。现在回想起来，搿种兴趣活动其实是一种培养小人专注能力个好办法，至少对我邪气有效。

小辰光学堂里还有专门个手工劳动课，课时勿多，每个礼拜只有一节。上课内容五花八门，有辰光是老师发统一个硬纸板材料包，让阿拉做各种造型，比如做成一棵树个形状个月历，用卡纸抽动就会微笑个小丑等等；有辰光让阿拉到附近南京路浪向有名个翼风模型店买材料，制作飞机、轮船个模型。对阿拉搿点小朋友来讲，每趟打开材料包侪特别有满足感。看看简单个说明，剪剪贴贴再装装橡皮筋、小螺丝就可以做出一样“作品”，尤其像小飞机模型，做好以后大家侪会拿到操场浪去比赛，看啥人做个飞机飞得远，一模一样个材料，为啥有种小飞机飞得远，有种就马上落下来呢？小朋友就会一道研究，迭个过程既培养了对说明书个理解能力和动手能力，也培养了观察能力，交关有意思。

至于体育活动课，掼沙包、跳橡皮筋、造房子侪是老师会组织学生白相嗰，只勿过课堂浪向辰光毕竟短，大家白相得勿够扎劲，所以会约了下课或放学以后再白相。现在个学堂里到了下课辰光，操场里经常是静悄悄嗰，原因是老师怕学生到操场浪向白相造成伤害事故，其实安全当然要重视，但过度保护并勿可取。

白相和学习实际浪向是勿冲突嗰，白相本身实际浪向也是学习个过程，只不过是换了一种更加轻松活泼个方式，真心希望老师能够多给学生白相个自由，下课十分钟个辰光操场浪向能充满欢声笑语，放学以后同学们也可以一道再白相相，而勿是除脱做功课就是去补课。