樱桃肉里呒没樱桃

文并图/沈一珠

楼下有棵樱桃树，从初春到仲春，忽冷勿热个日脚里，看伊一树粉红，开足开满；等花谢尽，新绿满枝，青青涩涩个果子就开始结起来了。

搿天出门回来，辣门口头碰着一个小姑娘，正缠牢仔伊姆妈要摘樱桃吃。我就跟伊讲：樱桃还呒没熟口来。

小姑娘踮仔脚，伸长仔手指着，告诉我：红了。抬头一看，真个呀，树浪向已经是粉红堂堂、晶莹剔透了，之前走进走出居然呒没看到。

树浪个樱桃好看，小巧玲珑，如珠如玉，就是酸得牙齿落脱；水果店里买个樱桃好吃，是进口种子，模子大交关。各人各欢喜。

唐代白居易看到樱桃，想到自家屋里两个歌姬：“樱桃樊素口，杨柳小蛮腰。”两个美娇娘，一个叫樊素，一个叫小蛮。倒是晓得了，除脱卖炭翁，白居易也写小娇娘。伊到了晚年，还买田造园子，养花钓鱼，拿日脚过成一首诗。

南宋蒋捷，国破山河在，飘零到吴江，齐巧春末夏初，樱桃正红，只勿过到伊眼睛里，可能就变成了一把鼻涕一把眼泪：“流光容易把人抛，红了樱桃，绿了芭蕉”。各人各心思。

写到此地，我倒是满心思侪是前两年，辣吴江老镇源吃过歇个一盆红烧肉，四四方方五花肉，肉皮浪切出一公分多出一眼眼个棋盘格，浓油赤酱端上来，肉皮微微收缩，形成一个球面，像煞一粒红樱桃，所以有一个好听名字——樱桃肉。

烧得顶挺括个樱桃肉应该一筷子下去一粒“樱桃”爽爽气气离开“棋盘”，绝对勿会牵丝攀藤。

假使侬碰着一家饭店，端一盘红烧肉上来，旁边用樱桃镶个边，硬劲讲是樱桃肉。迭种饭店，我也勿晓得讲伊啥好了。

至于樱桃肉个烧法，当初倒是听老镇源掌门人仔仔细细讲过一遍，只勿过，记勿牢；又想想，记牢了也呒啥用。