吃辣路浪向

文/许德华

旅途上“吃”也是一道风景。饿了随手买点心，山东火车站喷喷香个“吊炉烧饼”，看人家拿一块生面团成雕花样饼坯，倒贴辣烤炉顶浪，心里总感觉有点奇怪，搿块饼哪能勿落下来呢？再来一碗当地个“糊辣汤”，干稀搭配，好吃适意。

也有为招牌菜到名气响个店堂吃，我年轻辰光去西安看兵马俑，慕名到“同泰祥”吃伊拉个特色餐——羊肉泡馍（羊羹）。堂倌先拿拨我一只硬面饼（馍），叫我学旁边顾客个样子拿饼掰掰碎。我心里想，反正搿块饼要放到镬子里泡热汤个，还担心啥？所以只拿搿块饼掰成几块就结束了。结果人家掰得粉碎个馍泡辣羊肉汤里，邪气入味，客人吃得红光满面。我搿碗端上来，汤蛮好，馍硬咂咂，吃过以后胃里难过得一塌糊涂。

稻米粉个面条叫米线，顶有名个是云南蒙自“过桥米线”。传说老早有个书生离家辣河对面苦读，妻子每天送饭。到了冬天，两座小桥一过，饭就冷了。有趟妻子无意中熬了一碗鸡汤配米线，夫妻俩发觉鸡汤面浪个一层鸡油可以起到保温作用，汤面吃起来浑身暖热。后来妻子就常常搿能拨书生加营养，书生金榜题名了，过桥米线也成了一种邪气有名个风味美食。去云南旅游个辰光自然勿能错过搿种美食，就到当地一家比较有名气个店家尝鲜。看店家辣喃喃轻语个“过桥”声中，拨一只只小碟盛装菌菇、鹌鹑蛋、蛏、虾、木瓜、花椰菜等落到沸腾个汤锅里。当金灿灿个菊花撒入，迭道风景大餐终于可以开吃了，热腾腾个鸡汤香气扑鼻，让我恨勿得一记头喧光！

勿过，走到哪里吃到哪里，固然可以大块朵颐，但是有辰光也是有风险嗰。有一趟到西部山区旅游，当地人烧菜辰光特别欢喜放花椒，因为放得多，所以味道也特别冲，我吃个辰光呒没心理准备，一下子呛到喉咙透勿过气来。同桌吃饭个朋友看到我喘勿过气个狼狈样，以为我喉咙里拨啥物事堵牢了，马上抱牢我拼命摇晃，想让我喉咙里个物事摇出来。我拨伊摇得翻白眼，拼命摆手就是讲勿出闲话，过脱交关辰光才缓过来。

搿桩乌龙事体发生以后，我终于吸取教训，勿敢再瞎吃八吃，到了勿熟悉个地方，下馆子之前总归要先打听一番，而且还自备电饭煲解决吃勿惯地方饮食个问题。现在物流便当，吃面食个地方也能买到米，菜场也闹猛，上海人讲个“香菜”山东人叫“芫荽（yán sui）”，香菇蘑菇辣昆明侪叫“菌子”，云南屏边鸡蛋用草绳扎一串卖，江苏泗洪个手工空心挂面放到水里两头有泡泡出来。旅游到非洲，伊面个菜场看起来更加稀奇，当地人头浪顶仔又大又重个东西，走路仍旧稳稳当当。

一方水土养一方人，回转来还是上海屋里向吃个味道最好！