老早裁缝生意忙

文/杨建明

老早仔，阿婆阿姨买着一块欢喜个布料，侪要经过裁缝个巧手，才能缝制成衣裳行头，可以讲裁缝师傅是家家户户侪离勿开个手艺人，特别是每年春节前后，家境许可个家庭才讲究“新年新岁穿新衣”，裁缝师傅更是生意多得忙勿过来。

记忆里小辰光附近街面浪就有一间做裁缝生意个小店，门面勿大，进门就是两块大案板，每块案板侪比单人床大一眼，案板浪向整整齐齐铺了布垫。搿搭就是布料裁剪、成衣熨烫个操作场所。一只长柄铁熨斗搁辣一只铁架子浪，熨斗勿是用电嗰，用之前需要放辣炉子浪用火烧。案板上头有一根悬挂个横竿，上面挂仔交关勿同粗细个缝线，各种颜色侪有，五颜六色邪气好看。一边靠墙有2台脚踏缝纫机，1台主要用来制作新衣裳，1台用来接一点临时性个缝补生意。另一边有几排挂满成衣个衣架和一个用布帘围起来个试衣间。

埃歇辰光裁缝是一门相当吃香个行当，手艺精、口碑好个老师傅从来勿缺生意做。我小辰光有空就会到裁缝店附近看野眼，就为了看裁缝师傅哪能做生活。店里向有一位上了点年纪个老师傅，做生活个辰光总归要戴一副老花眼镜，量尺寸、画版样、裁剪、缝制、锁扣眼、剪线头、烫角边……一眼勿会马虎。当时我对裁缝铺里个熨斗特别感兴趣，最喜欢看老师傅烫衣裳。伊先拿做好个衣裳摊放辣案板浪，整理得平平整整，上面盖一块白颜色个湿布，再拿烧热个铁熨斗轻轻放到湿布浪慢慢滑动，湿布发出“嗞嗞”声，冒起一股股白汽，一片软搭搭个衣领就变得挺括了，裤线也变得笔笃势直。

搿爿店个生意邪气好，虽然有几个徒弟帮忙，老师傅还是有做勿光个生活，尤其是逢年过节，常常夜里还要加班。凡辣伊搿搭做个衣裳有了脱线、破洞或者边边角角弄坏脱了，客人来寻老师傅缝补，老师傅侪会一口答应，马上放下手里向个生活，先帮客人修补，基本浪侪是立等可取，而且小修小补勿收钞票，服务邪气到位，所以口碑好得勿得了。

一晃几十年过去了，交关老早仔个手艺行当侪拨工业化生产替代了，裁缝行当虽然呒没完全消失，但是也只剩少数了，其中大部分还是高端定制类嗰。想想也辣情理之中，毕竟大批量工业化生产有成本低、质量稳定个优势，再加上现在大家个经济状况比老早仔好得多，想添置衣裳，到服装店里兜一圈，各种服装看得见摸得着，看到欢喜个就可以试穿，试穿合适就可以买下来，只要勿是奢侈品牌，价钿也勿算贵。不像老早买布料请裁缝师傅做，做好做坏也勿确定，假使裁缝师傅手艺搭浆，再好个布料也是浪费。勿过，大批量生产个服装只能按照几种尺码制作，对个人来讲勿一定合身，假使对搿方面要求比较高，还是请靠谱个裁缝师傅量体裁衣比较好。

勿得勿承认，对大多数人来讲，裁缝行业已经渐行渐远，濒临消失了，这也从一个侧面说明，现在个生活水平远超过去，老早仔“新三年，旧三年，缝缝补补又三年”个时代已经成为历史了。