冷天里好孵个地方

文/侯宝良

最近上海降温邪气明显，之前穿辣身浪个薄羽绒服好像有点“挡勿牢”了，勿得勿又换了一件厚羽绒服。勿过，对阿拉搿点经历过四五十前个冬天个人来讲，现在个冷天真个勿算啥，滴水成冰个日脚一共呒没几天。老底子个上海冷天介才真正叫日脚难过，当时屋里呒没空调，也没北方人家个暖气设备，一般人要想适意一点，除脱孵太阳，就是热水潽汤吃碗粥，再弄只汤婆子、盐水瓶焐焐手。勿过有腔调个享受倒有两个好地方，就是所谓“皮包水、水包皮”个场所。

啥叫“皮包水”？就是到茶馆店吃茶，一口口热茶吃进去，身体里个血液循环好像也快起来了，又是介许多人轧辣一道，哪能会得勿暖热呢？假使手里钞票少，勿舍得“泡茶馆”，葛末到弄堂里个老虎灶孵孵也是蛮惬意嗰。侬看，几只台子拼起来、几根条凳围一圈，大灶就辣“塞脚跟”（近身边），镬子里向哒哒滚，冒出蒸汽热腾腾，吃吃茶唻听听书，嘎嘎山河覅当真，“瞎三话四”勿生根。就迭能暖烘烘孵辣里向，比起外头西北风里“出风头”，阿是覅忒适意噢？

侬也覅小看搿些地方，老早信息传播勿发达，搿种地方往往是小道消息个集散地，当年公安机关破获勿少大案要案就是辣老虎灶、茶馆店里发现线索嗰。

至于“水包皮”个地方就是“混堂”了，也就是公共浴室。到公共浴室里汏浴，老底子就叫“孵混堂”。到热水池里泡泡身体，请技工师傅搓搓背、按按摩，再到休息室里点一壶茶水，吃点苏州豆腐干、老城隍庙五香豆咾啥个小点心，到躺椅浪盖条毛巾毯困一歇，浑身舒畅。老早日脚请客孵混堂，也是谈生意、笼络人情个地方。大家晓得，一般人辣轻松状态下，啥事体侪好讲，所以搿种地方谈生意个成功率也是邪气高。

冷天又来了，勿过以大家现在个生活条件，还有啥人会因为怕冷去寻好孵孵个地方呢？