天冷了，吃美容猪脚爪

文并图/沈一珠

已经过了大雪节气了，虽然，辣现在迭只越来越热个地球浪，特别是辣阿拉江南一带，要等着一场大雪也是邪气困难嗰。

勿过，到底天气也是有点阴丝丝，是冷天个样子了。

坐辣电脑面前，后背靠近北阳台，总觉得着一阵阵寒邪气，赛过已经洇进玻璃窗，又洇进衣裳；豪忄叜立起来，拉好厚窗帘，寻出电暖座垫，开好；还勿来三，索价立起来，用热水泡一泡脚。

好了，总算回过神来，继续写。

所以，搿两日，勿好大意，要注意风邪和寒邪个侵入，注意防寒保暖，尤其是头和脚。

记得备几顶漂亮帽子——绒线嗰、毛呢嗰，又防风，又好看；至于脚浪，顶好是备双蚌壳棉鞋，布个千层底，帮是毛呢面子棉布夹里，里向夹层是棉花嗰。

从前老古话讲起来，寒从脚起。脚暖了，心就勿大冷了。

至于吃食方面，也可以适当朝暖热里靠了。

考究点，可以请中医搭搭脉，针对性配点膏方吃吃；或者，民间常用个方子，买点阿胶用花雕酒泡软了，加点核桃芝麻冰糖一道炖炖，对怕冷个女人来讲，也蛮有用场。

或者，落实到平常日脚个饭台子浪，迭几天，可以适当增加一眼高热量、高蛋白、高脂类、低盐类个温补食物，像蹄髈、猪脚爪，适当加点红枣、桂圆之类。

大冷天容易心情郁闷，稍许吃甜一眼，可以改善心情。葛末就来一只栗子桂圆炖猪脚爪。

材料：栗子200克，桂圆100克或桂圆肉适量，猪脚爪2只，盐、料酒适量。

做法：先拿栗子放进开水煮几分钟，捞出来冷一冷，膜剥清爽，沥干；猪脚爪汏清爽斩成块，开水焯一焯，汏清爽。

再拿栗子和猪脚爪一道放进炖锅，加清水，浸没材料，大火烧开，撇去浮沫，加料酒后，转小火炖到猪脚爪酥烂。

桂圆剥肉，或者直接用桂圆肉，温水汏一汏，放进炖锅里一道再炖5分钟左右就可以了，最后加稍许盐，就可以吃了。

大冷天本来就空气干燥，皮肤缺乏弹性。中医认为，栗子补脾健胃、补肾强筋，尤其对肾虚有帮助；猪脚爪里有大量胶原蛋白，可以让皮肤有弹性和韧性，脂肪含量却低于肥肉，所以猪脚爪可算是由内而外个“化妆品”了。