镇馆之宝再相会

文/许德华

前一抢到上海博物馆参观“鼎盛千秋——上海博物馆受赠青铜鼎特展”，21件展品侪是西周到春秋战国时期有铭文个青铜鼎。有种讲法是收藏青铜器不在于器物大小，而在于器物浪有勿有铭文。即便是一件很小个杂器，有铭文也会让伊身价陡增。其中，潘氏家族捐赠个大盂鼎、大克鼎是迄今为止有铭文青铜鼎里向最大个两件，同现藏台北故宫博物院个毛公鼎合称“三宝”。为了弥补毛公鼎呒没到场个缺憾，搿趟是以全形拓个形式辣展览中展示嗰。

二楼特展厅里，大克鼎、大盂鼎布置辣最前头，双鼎落地摆放，高1米上下，口径75厘米左右，鼎浪铜绿幽暗吸人眼球。搿两件宝鼎200年前后出土于陕西省，后为潘家珍藏。潘家祖浪特别珍惜先到个大盂鼎，从不示人，最多让人看看鼎内291字铭文个复制品，搿主要记录了西周初期个文治武功搭仔殷商亡国个教训。潘家自从拥有了国宝，惊心动魄个事体就勿断发生，日本侵略中国个辰光，一帮强盗一天里向七趟搜查苏州潘宅。当时潘家掌门人孙媳妇潘达于刚刚廿岁出头，生活相当艰难。为了护宝，伊想仔勿少办法，最终深埋宝鼎于地下。

中华人民共和国成立以后，潘女士深明大义，拿搿两件宝鼎无偿捐献国家，成了上海博物馆个“镇馆之宝”。1959年，为庆祝中华人民共和国成立十周年，大盂鼎北上，现藏北京中国国家博物馆。2004年，国家文物局、中国国家博物馆、上海博物馆曾举办大盂鼎、大克鼎联合展出，纪念捐赠人潘达于女士百岁寿诞。埃歇辰光两鼎重聚上海，我从电视新闻里看到上海博物馆馆长陈燮君陪同有关领导拜访老人家，潘老太太笑眯眯，言谈举止邪气清爽。

搿趟展览吸引了不少中学生，伊拉勿但认真看搿两只大鼎，还同样认真看其他一道亮相个19只青铜鼎。上博拿所有捐赠人个姓名搭仔履历侪摆辣醒目个地方，以此感谢所有国宝捐赠人。

负责安保个工作人员相当尽心，静悄悄个引导观众依序参观。通过交谈，我了解到留辣上博个大克鼎虽然个头比大盂鼎小，但其雕琢个花纹精致独特，腹部宽大个纹饰波澜起伏节奏感强。鼎腹内壁铭文290字，记录了作器者为“克”，伊是管理王室饮食个官员。两段铭文是研究西周社会政治、经济个重要资料。

我问搿位先生此展之后最大期盼是啥？伊讲盼望有一天毛公鼎搭大盂鼎、大克鼎三大国宝能相聚上博，伊还能够负责导览！我个想法同搿位导览员一致，也希望有朝一日能辣上博看到国宝三姊妹相聚。

参观结束，我还开开心心品尝了大克鼎雪糕，有抹茶味和巧克力味两种可选。有网友讲廿块洋钿一根有点贵。哈，含辣嘴巴里个珍宝是贵个问题口伐？