衡山电影院今昔

文/黄政一

衡山电影院是1951年8月17日开工兴建嗰，坐落辣衡山路西面一个大花园里。最初是靠社会集资搞起来嗰，当时还发了股票。大家齐心协力，只用了四个多月，搿家庭院式影院就开业了。开业以后，大大丰富了附近居民个文化生活，每当电影院散场，人流涌动，人声鼎沸，邪气闹猛。

上世纪六七十年代末，阿拉几家人家几经拆档，又慢慢整合到日子静好，到衡山电影院看电影成了阿拉最开心个事体。当时买票个任务由阿爸承担，电影票也是蛮便宜嗰，记得正常票价是一角洋钿，早早场电影票比较便宜，一张票只要五分洋钿。后来涨价了，也只要二角洋钿搭仔二角五分。

衡山电影院售票处朝西，有两只卖票窗口，一只窗口卖当天票，一只窗口卖隔天票，工作人员两男两女。碰着好看个电影，需要一早就去排队，去得晚了就卖光了。想要节约铜钿就看早早场。

当年居民屋里侪呒没空调，有冷气个公共场所也勿多，电影院是少数有冷气个地方。放暑假，高温天，吃好早饭到电影院里孵冷气看电影，真是邪气惬意。

记得当时衡山电影院西面有一家食品店，热天有冷饮供应。阿拉一家门一道去看电影，阿爸姆妈会先到食品店买几根棒冰，当时棒冰四分一根、小雪糕八分一根、大雪糕一角贰分一根、紫雪糕贰角贰分一根，棒冰品种也蛮多，有盐水、赤豆、绿豆、橘子、奶油味道嗰，坐辣电影院个沙发椅浪，嘴巴里是甜咪咪个棒冰，坐等电影开场，心里美滋滋。

搿家食品店现在成了“女枪手”餐厅，主营墨西哥风味菜。伊西边有两家开辣独幢花园里个酒吧，东头开了一家儿童摄影花店。老朝搿搭是一堵围墙，影院破墙，开了四五只玻璃橱窗，里向展示个是电影海报和影片介绍。坐辣“女枪手”餐厅里向，一边享用美食美酒，一边静赏窗外梧桐绿荫，也是一桩蛮有意思个事体。

到了现在，我看电影个次数越来越少了，有几次陪姆妈进衡山电影院勿是去看电影，而是去听评弹嗰。上海评弹团送戏到社区，普及评弹，发扬光大评弹。陈希安伯伯还兼做主持。

五年前，有一天我走辣天平路浪，突然想去看看衡山电影院。一个人踱进空荡荡个影院大厅，走到售票处，有三位“美眉”值班。我问伊拉放映厅有多少座位。一位“美眉”大概以为我是搞工会工作嗰，笑脸相迎，讲：“放映厅有三只，你要包场口伐？”“勿是嗰，随便问问。”“呒没关系。阿拉大厅有562只座位，中厅131只，小厅52只。”我心想搿位小姑娘业务真熟。呒没想到，伊还拿出一张纸片拿搿眼数字郑重其事写下来。搿张纸片我一直珍藏至今。