热天里个一把壶

文/钱红春

天热容易出汗，水也喝得多，所以屋里向要备点冷开水，啥人晓得烧开水个电水壶坏脱了。

讲起来也勿是啥大毛病，就是水烧开以后勿会自动断电，我只好烧水个辰光等辣旁边，等水壶冒热气，发出咕嘟咕嘟声音就动手关开关。我想搿勿是长久之计，屋里向就我同老伴两家头，侪七老八十了，忘记性大，假使一勿当心壶里水烧干脱，就要闯祸了。水壶烧坏脱，损失点钞票倒也算了，假使引起用电事故，事体就大了。搿种事体，报纸浪，电视里常常有报道。

曾经想厾脱再买只新嗰，但想想又有点舍勿得，于是就想请人修修。到啥地方修呢？先打电话问问商家，讲要寄到工厂里，想想太麻烦。附近几条马路店倒是交交关，但呒没一家是修家电嗰。上网查查，修家电个网店勿少，信箱里也常常有搿种小广告，但我勿敢寻伊拉。前两年屋里煤气灶自动点火失灵，上网查着“特约维修点”，电话打过去，一歇歇工夫就有人上门来。伊从工具袋里摸出一把小榔头，辣煤气灶浪搿搭敲敲，伊搭敲敲，又翻起面板看看，讲要换套新个点火系统。又讲单修勿合算，劝我买只新煤气灶，还讲可以帮我弄到优惠价。弄仔半天，伊是来推销煤气灶嗰，煤气灶呒没修好，还收我一百块上门费。我呒没睬伊，自家到商场买了只新嗰。

不过，让电水壶天天“带病工作”也勿是生意经。有天我无意当中对邻居老张讲起搿桩事体，伊让我问问小何。小何是阿拉小区物业个修理工。伊年纪勿大，个子勿高，勿胖勿瘦，见人就笑，为人邪气随和，听说伊老家辣江西。我搬到小区个辰光，就常常看见伊背仔工具包东奔西走。我屋里门窗坏脱、电灯勿亮、水管漏水、马桶塞牢，侪是伊上门来修。伊勿但服务态度好，技术也是呱呱叫，每趟侪是一次搞定，从来呒没返过工。日脚长了，我每趟报修侪指名要伊上门，后来物业干脆拿伊个手机号码告诉我，有啥事体就直接寻伊。

老早我只晓得物业修理工对小区个公共设施以及屋里个固定配置负责维修。辣我眼里，搿点侪是粗生活，呒啥技术含量，呒没想到伊还会修家电。老张讲，侬覅看小何平常闲话勿多，伊个维修技术邪气好，一般小家电维修侪难勿倒伊。听说有一年镇里举办物业修理工技术比赛，伊还获得第一名。老张最后讲：“侬屋里个电水壶，伊应该会得修嗰。”

隔天我碰着小何，对伊讲起搿桩事体。伊张口就讲：“搿可能是温控开关坏脱了。”随即问我：“是我到侬屋里拿，还是侬自家送过来？”我一听有苗头，就讲：“侬介忙，我送过来好了。”

呒没多少辰光，小何果然拿电水壶修好了，我心里个石头也终于落地了。有只歌叫“冬天里个一把火”，蛮好听嗰，我也会哼两句。搿天大概是高兴过头了，被我唱成“热天里个一把壶”。