文/王志良
礼拜天,整理五斗橱,辣上层抽屉个角落里翻出两盒蛤蜊油(一种放辣蛤蜊壳内个全油性护肤油脂)。迭个让我惊诧勿已,搿两盒蛤蜊油应该辣搿搭放仔十几年了,打开盒盖,尽管油性已经勿足,依稀还能闻到一缕清淡馨香,让我想起勿少小辰光个事体。
记忆里,埃歇辰光冬天比现在冷得多,迭种蛤蜊油就是阿拉一家门冬天护肤个法宝,擦辣面孔浪、手浪,效果邪气好。入冬前,姆妈会到烟纸店买五六盒蛤蜊油回来,价钿也勿贵,几分洋钿一盒,足够阿拉兄妹四家头用一个冬天。每天早浪起床,揩过面孔,姆妈就拿阿拉三兄弟和姐姐叫到身边,左手拿蛤蜊油,右手用食指从蛤蜊油表层刮一点,再涂抹到阿拉面孔浪,轻揉慢抹,涂匀为止。
有一趟,半夜里落起了雨,放辣外头个柴爿被雨水浇湿,呒没办法点煤球炉,眼看阿拉上学辰光要到了,姆妈只好用热水瓶里个开水泡仔四碗泡饭让阿拉吃。吃好以后,大阿哥、二阿哥立辣门口,三姐和我靠辣门框浪。姆妈看到阿拉勿出门,讲:“辰光要到了,快点去学堂。”阿姐讲:“侬还呒没帮阿拉抹蛤蜊油呢。”于是,姆妈连忙放下手里向个生活,一边替阿拉抹蛤蜊油,一边讲:“下趟我忙起来呒没辰光,那侪自家动手。”我搭仔阿姐异口同声讲:“勿好,还是侬抹好,让阿拉自家抹,一盒油几天就用光了。”
蛤蜊油价廉物美,勿仅护肤功效好,而且外包装也赏心悦目,有一趟课间休息,几个女同学从衣兜里拿出蛤蜊油比较,看啥人个蚌壳完整清洁,图案条纹清晰漂亮,商标完好无缺。
等几盒蛤蜊油用光了,姆妈会抽空用锥子小心翼翼辣蛤蜊壳浪钻个小洞,再用一根蜡线串起来,做成一串风铃,挂辣门框浪。风一吹,风铃一摇一晃,发出叮叮铛铛个声音,就像春天奏鸣曲,预示着春天就要来了……
后来姆妈退休了,年纪大了,仍旧只喜欢用蛤蜊油。每年深秋辰光,我总要预先备妥。有辰光去商场询问,年轻营业员反问我,蛤蜊油是勿是进口化妆品?我一下子勿晓得哪能回答。所幸兜兜转转,总能买到。一次辣平凉路、隆昌路口一家环球商场里看到,我一下子买了十盒备用。
姆妈离开阿拉已经十多年了。我现在既怕天冷,又渴望冷天早点来。怕天冷是因为凛冽北风会吹皴皮肤。渴望冷天是因为辣迭个季节我时常做梦,梦见姆妈个手指辣我面孔浪轻揉慢抹个情景,醒来辰光泪湿枕巾。