好吃好用个边角料

文/侯宝良

现在提倡节约型社会，勿管辣屋里还是辣饭馆里向，侪讲究光盘。其实辣食品个生产环节浪还有勿少可以节约个食物。阿拉小辰光就有勿少吃食搭仔家用品是商店里买个边角料。

先讲食品，有碎饼干、切割华夫个边料、碎屑，定制奶油蛋糕个余料，覅看搿眼物事零零碎碎勿起眼，其实味道侪勿差，价钿交关便宜，深受大家欢迎，想要买到还要掐准辰光去门店排队。像阿拉以前住辣老西门，离小北门个南市豆制品厂勿远，南市豆制品厂个门市部每天下半日有新鲜个豆制品边角料出售，有碎豆腐干、碎粉皮、碎腐竹、碎素鸡咾啥，到边角料上市个辰光，门市部前面排队个人交交关。覅看是碎料，其实买回来烧菜之前总归要切碎嗰。下班后屋里吃晚饭人多，搿眼豆制品边料加眼蔬菜就是一桌丰盛个夜饭。像豆腐干丝炒芹菜、炒粉皮、腐竹咸肉汤、红烧素鸡酱油蛋……色香味侪勿错，质量好才是硬道理。

有辰光食品店也有卖碎蛋糕、碎饼干咾啥嗰，勿过碰着个机会勿多，基本浪侪是因为辣运输或搬运环节发生意外，才会产生搿种便宜货。摆到柜面浪卖个机会就更少了，大多数侪是商店员工内部消化脱了。

讲到零食，邻居阿六头邪气有吃福，因为伊有好几个亲眷辣不同个食品厂工作，常常买回来工厂生产饼干个边角料——各种各样碎饼干，品种邪气多，阿拉搿排邻居小朋友侪老眼热嗰。伊吃多了勿稀奇，也经常送拨阿拉吃。放辣豆浆、牛奶里泡来当早点心，香喷喷覅太赞哦！

除脱吃嗰，用个物事也勿少，像皮件厂里零碎皮、服装厂零头布料，是皮匠、裁缝师傅、家庭主妇欢喜个物事。惯于精打细算又手巧个阿姨、妈妈们去淘来各种布料拼接成款式勿同个马甲、外套，特别是小囡多个人家，买零头布料勿要布票，可以让屋里人多几身替换衣裳。

家具厂、木器加工厂个边角料是木匠师傅搭仔动手力强个爷叔、伯伯欢喜买个物事。阿拉丈人就用交关小木头加胶水拼接了一只大个圆台面，台面浪贴一张装饰板，看起来邪气漂亮。逢年过节一家们围坐一圈，谈谈吃吃，阖家团圆！

阿拉搿辈人侪喜欢自己动手花小钞票办大事，而且尽量做到物尽其用。时代变了，观念更新了，虽然勿能墨守陈规，但也勿能忘记初心，失去底线。真希望实惠个边角料再重返市场。